გუშინ, 2 ივნისს თბილისში მოქალაქეებს ყვავები დაესხნენ თავს. ინფორმაცია თავდაპირველად ambebi.ge-მ გაავრცელა, ფაქტის ამსახველი ვიდეომასალა კი ფორმულაზე გამოქვეყნდა.

როგორც On.ge-ს ნიუ ჰოსპიტალში განუცხადეს, ყვავის თავდასხმის შედეგად კლინიკაში 5 პაციენტი, მსუბუქი დაზიანებებით შეიყვანეს.

"5 ქალი იყო ყვავის თავდასხმის შედეგად შემოყვანილი, გადაუდებელი დახმარების განყოფილებაში შემოვიდნენ, გაეწიათ დახმარება და გარკვეული პერიოდის შემდეგ ბინაზე გაეწერენ", — აღნიშნეს ჰოსპიტალში.

იმედინიუსთან საუბარში ზოოპარკის დირექტორი ზურაბ გურიელიძე განმარტავს, რომ მომხდარში "მისტიკური არაფერია" და ამ ფორმით მშობელი ყვავები იცავენ ბახალებს, რომლებიც ფრენას სწავლობენ და ძირს ვარდებიან. მისი თქმით, სწორედ ამიტომ ესხმიან ყვავები თავს მოქალაქეებს.