Twitter-მა ამერიკის პრეზიდენტის ტვიტი დამალა და მიზეზად "ძალადობის წახალისება" მიუთითა. დონალდ ტრამპის მიერ გამოქვეყნებული სტატუსი მინეაპოლისში შეკრებილ აქტივისტებს აფრთხილებდა. მოქალაქეები დაკავებისას აფროამერიკელი კაცის, ჯორჯ ფლოიდის მკვლელობას აპროტესტებენ. ჯორჯ ფლოიდი მას შემდეგ გარდაიცვალა, რაც თეთრკანიანმა პოლიციელმა ის ასფალტზე დააწვინა და კისერზე მუხლი დააჭირა.

"როცა იწყება მოროდიორობა, იწყება სროლაც", — ამ სიტყვებით გააფრთხილა ტრამპმა მოქალაქეები და იმავე ტვიტში ქალაქის მერს სამხედრო დახმარება აღუთქვა.

გამოქვეყნებიდან ორ საათში, ტვიტერმა პოსტი დამალა, მასზე გაფრთხილება განათავსა და ისიც ახსნა, რატომ არ წაშალა პოსტი:

"ეს ტვიტი სოციალური მედიის წესებს ეწინააღმდეგება და ახალისებს ძალადობას. თუმცა, მაღალი საზოგადოებრივი ინტერესის გამო, ის კვლავ ხელმისაწვდომია".

გაფრთხილება გადავიდა იმ ადამიანების პროფილებზეც, რომლებმაც ის გადატვიტეს. პრეზიდენტის მიერ გამოქვეყნებული ტექსტის წაკითხვა მომხმარებლებს ტვიტზე "ნახვის" ფუნქციის მითითების შემდეგ შეუძლიათ.

მინეაპოლისის ქუჩებში პროტესტი მესამე დღეა არ წყდება. არეულობის დროს არაერთი მაღაზია და მანქანა დაზიანდა. პროტესტის მონაწილეებმა ერთ-ერთ სავაჭრო ცენტრში გააჩინეს ხანძარი და პოლიციიის განყოფილება გადაწვეს. მინესოტას შტატის გუბერნატორმა ქალაქსა და მის შემოგარენში ეროვნული გვარდიის 500 წევრი გაგზავნა და "მშვიდობიან დროს საგანგებო სიტუაცია" გამოაცხადა.

ფლოიდის დაკავების მიზეზი სავარაუდო ყალბი 10-დოლარიანი იყო. გამვლელის მიერ გადაღებულ ვიდეოში, რომელიც სოციალურ ქსელში მალევე გავრცელდა, ჩანს, რომ დაკავებული კისრიდან ფეხის აღებას ითხოვს, რადგან ვერ სუნთქავს: "ვერ ვსუნთქავ", "არ მომკლათ" — ამ სიტყვებს იძახდა ფლოიდი სიცოცხლის ბოლო წუთებში.