სახელმწიფო უსაფრთხოების სამსახურის უფროსი ვახტანგ გომელაური მიიჩნევს, რომ ჯერჯერობით ადამიანებს, რომლებიც ფარულ მიყურადებაზე აცხადებენ პრეტენზიებს, შესაბამისი მტკიცებულებები არ წარმოუდგენიათ.

ჟურნალისტებმა გომელაურს კითხვა ქუთაისში, პარლამენტში ყოფნისას დაუსვეს ამჟამად პრეზიდენტ მარგველაშვილის პრეს სპიკერის, ეკა მიშველაძის საჯარო განცხადებაზე. მიშველაძემ ჯერ კიდევ ჟურნალისტობისას განაცხადა, რომ მას და მის ქმარს, ალექსი პეტრიაშვილს ფარულად უთვალთვალებდნენ, რაც ამ დრომდე არ არის გამოძიებული.

გომელაურის პასუხი ამ კითხვაზე ასეთი იყო:

"პროკურატურას მიმართეს როგორც ვიცი. მე ხშირად მესმის, რომ არის ფარული მიყურადება, ფარული თვალთვალი, თუმცა, ჯერ ერთი ფაქტიც არ არის. პროკურატურაში მიიტანონ და თუ დადასტურდა, მე მზად ვარ პასუხი ვაგოთ ამ ყველაფერზე. თუ დასასჯელი იქნება ესა თუ ის ადამიანი, ის დაისჯება, რაც არაერთხელ მომხდარა ჩვენი ხელისუფლებაში ყოფნის დროს".

ჟურნალისტები ასევე დაინტერესდნენ, თუ რა ეტაპზეა პირადი ცხოვრების ამსახველი კადრების გავრცელებასთან დაკავშირებით დაწყებული გამოძიება. გომელაურის თქმით, გამოძიებას პროკურატურა ატარებს, სუსი მათ მხოლოდ ტექნიკურ ნაწილში ეხმარება. შესაბამისად, როცა პროკურატურა მიიჩნევს საჭიროდ, ამ საკითხზე განცხადებაც მაშინ გაკეთდება.

სახელმწიფო უსაფრთხოების სამსახურის უფროსი ვახტანგ გომელაური 12 მაისს ქუთაისში, პარლამენტის წინაშე საქმიანობის ანგარიშით უნდა გამოსულიყო, თუმცა, ეს უკვე მეორედ ვერ მოხერხდა. პირველად მისი გამოსვლის ჩაშლის მიზეზი კვორუმის არარსებობა გახდა, ამჯერად კი, პარლამენტი მთელი დღის განმავლობაში განიხილავდა საკონსტიტუციო სასამართლოსთან დაკავშირებულ საკანონმდებლო ცვლილებებს. გომელაურის თქმით, მას შემდეგი დღეების გრაფიკი გადატვირთული აქვს და პარლამენტისადმი პატივისცემის მიუხედავად, ის საკანონმდებლო ორგანოში კიდევ ერთხელ მოსვლას ვერ შეძლებს.