ევროპული საქართველოს წევრი, ოთარ კახიძე ამბობს, რომ ქართულმა ოცნებამ, საგანგებო მდგომარეობის გარეშე შეზღუდვების დაწესების შესახებ კანონპროექტზე მხარდაჭერით, პოლიტიკური უთავმოყვარეობის რეკორდი მოხსნა.

მისი თქმით, საპარლამენტო უმრავლესობის წერვები, საკუთარ თავს, როგორც ინსტიტუტს, აუქმებენ.

"ქართულმა ოცნებამ, პრაქტიკულად, ყველა რეკორდი მოხსნა პოლიტიკური უთავმოყვარეობის. პრაქტიკულად, საკუთარ თავს, როგორც ინსტიტუტს, აუქმებენ. მთავრობას ეუბნებიან, რომ მე კი აღარ ვიქნები შენი მაკონტროლებელი, მე კი აღარ დავაწესებ რეგულაციებს, შენ გადაწყვიტე როგორც მოგეხასიათოს და როგორ საჭიროდ ჩაათვალოო. პრინციპში, ივანიშვილისგან გასაკვირი არ არის, მაგრამ კიდევ ერთხელ გვარწმუნებს, რომ შემოდგომაზე ეროვნული ამოცანაა, ასეთი ხელისუფლების შეცვლა", — განუცხადა კახიძემ რუსთავი 2-ს.

პარლამენტში ინიცირებული კანონპროექტის მიხედვით, ხელისუფლებას გარკვეული უფლებები საგანგებო მდგომარეობის გამოცხადების გარეშე ეძლევა. მათ შორისაა მიმოსვლის, საკუთრების, სოციალური ღონისძიების მიზნით თავშეყრის შეზღუდვის შესაძლებლობაც. კანონპროექტის ავტორი ქართული ოცნების დეპუტატი დიმიტრი ხუნდაძეა. მას ორი კანონის შეცვლა სურს — კანონი საზოგადოებრივი ჯანმრთელობის შესახებ და სისხლის სამართლის საპროცესო კოდექსი.

ცვლილებებს პარლამენტი დაჩქარებული წესით განიხილავს. კანონპროექტის პირველი მოსმენა და პირველი კენჭისყრა 21 მაისს პლენარულ სხდომაზე გაიმართა, ხოლო, სავარაუდოდ, დღეს 22 მაისს, მეორე და მესამე მოსმენა იქნება, შემდეგ კი საბოლოო კენჭისყრა.