აშშ-ს ელჩი საქართველოში, კელი დეგნანი ამბობს, რომ 8 მარტის შეთანხმება დამატებით ახსნას აღარ საჭიროებს და მხარეებმა პირობები იციან. რაც შეეხება, გიორგი რურუას გათავისუფლებას, ელჩი ამბობს, რომ ის ვერ გააკეთებს კომენტარს სასამართლოში მიმდინარე საქმეზე, რადგან ეს ფასილიტატორის როლი არაა.

"მხარეებმა იციან რა პირობებიც არის იქ და რა პირობებზე დათანხმდნენ. მათ თავად შეიმუშავეს [ის] და მისი სრული განხორციელება არის ქვეყნის ინტერესებში, რადგან იგი მიმართულია პარალიზებული პოლიტიკური სისტემის დეპოლარიზაციისკენ და 2020 წლის არჩევნებისთვის უკეთესი პირობების შექმნისთვის, ისეთი არჩევნებისთვის, რომლითაც ქართველი ხალხი იამაყებს", — აღნიშნა ელჩმა ონლაინ პრესკონფერენციის დროს.

ელჩის განცხადებით, მნიშვნელოვანია, რომ შეთანხმება სრულად განხორციელდეს და საკონსტიტუციო ცვლილებები გატარდეს.

კელი დეგნანი აღნიშნავს, რომ საარჩევნო რეფორმებთან დაკავშირებით ისინი აგრძელებენ პარლამენტთან მუშაობას:

"ამ თანამშრომლობის ფარგლებში ამერიკის შეერთებული შტატები უზრუნველყოფს რეკომენდაციების და რჩევების გაცემას საარჩევნო რეფორმის კანონმდებლობასთან დაკავშირებით იმისთვის, რომ ეუთოს რეკომენდაციები იყოს სრულად ასახული კანონმდებლობაში. ეს რეკომენდაციების სპეციალურადაა შექმნილი იმისთვის, რომ პასუხი გაეცეს იმ ხარვეზებს, რასაც ადგილი ჰქონდა წინა არჩევნებზე".