სასჯელაღსრულებისა და პრობაციის მინისტრის მოვალეობის შემსრულებელი, კახი კახიშვილი აცხადებს, რომ იგეგმება ახალი ციხის მშენებლობა, სადაც 14–დან 21 წლამდე მსჯავრდებულები განთავსდებიან.

სამომავლო გეგმების შესახებ კახიშვილმა პარლამენტში, საკომიტეტო მოსმენისას განაცხადა:

"ჩვენ ძალიან კარგად გვესმის, რომ ერთი კალენდარული დღე არაფერს არ ცვლის ბუნებაში და ბუნებრივია, 18 წლის ასაკის მიღწევისთანავე, ჩვენი აზრით, არ იქნებოდა სწორი პატიმრების გადაყვანა სრულწლოვანი მსჯავრდადებულების დაწესებულებაში, ამიტომაც, ევროკავშირის რეკომენდაციითა და მხარდაჭერით აშენდება ახალი დაწესებულება. სისტემაში მყოფი ამ ასაკის მსჯავრდებულები განთავსდებიან ერთად, სადაც ამ ასაკისთვის გათვალისწინებული პროგრამები იქნება უზრუნველყოფილი".

კახიშვილის თქმით, მსგავსი ნაბიჯები იდგმება, რათა ამ ადამიანთა საზოგადოებაში ინტეგრირება, სასჯელის მოხდის შემდეგ, უფრო ადვილად მოხდეს.