სამეგრელო-ზემო სვანეთის სახელმწიფო რწმუნებული ზუგდიდში სამეგრელოს ეპიდსიტუაციის შეფასებისას აცხადებს, რომ ამ ეტაპზე ქალაქის ჩაკეტვა არ განიხილება, რადგან ინფიცირებულების კონტაქტები მიკვლევადია. რწმუნებულის კომენტარს მისივე პრესსამსახური ავრცელებს. ალექსანდრე მოწერელიას განმარტებით ზომების გამკაცრება დღის წესრიგში მას შემდეგ დადგება, თუ იქნება შემთხვევა როცა კონტაქტების გამოკვლევა შეუძლებელი იქნება:

"ჩაიკეტება თუ არა ზუგდიდი რთული სათქმელია, თუმცა თუ გავრცელება იქნება ფართო მასშტაბის, ეს საკითხი დადგება დღის წესრიგში. პირველ რიგში, ეს არის გადასაწყვეტი ჯანდაცვის სფეროს წარმომადგენლების მხრიდან. დღეის მონაცემებით, ტრაილერის მძღოლის ყველა კლასტერის კონტაქტები პრაქტიკულად, ჯერ-ჯერობით არის მიკვლევადი, შესაბამისად ეს ადამიანები გადაგვყავს კარანტინში. თუ გვექნება შემთხვევა, როცა ვერ დადგინდება კონტაქტები, მაშინ რა თქმა უნდა მოგვიწევს ზომების გამკაცრების დღის წესრიგში დაყენება. ამ შემთხვევაში ჩვენ ჯანდაცვის მუშაკების ყველა რეკომენდაციებს და მითითებებს გავითვალისწინებთ".

დღეს რეგიონში 70-ზე მეტი ნიმუშია აღებული გამოსაკვლევად. ამ ნიმუშებიდან 8 არის ტრაილერის მძღოლის კონტაქტი, აღებულ ანალიზებზე პასუხი იქნება დღის ბოლოს. ტრაილერის მძღოლიანად სულ ამ კლასტერში კოვიდი უდასტურდება 7 პაციენტს.

ანაკლია-განმუხურის საკარანტინო სივრცეში ამ დროისთვის მოთავსებულია 56 პირი. რაც შეეხება თვითიზოლაციას რეგიონში ამ დროის მონაცემებით, 205 პირია თვითიზოლაციაში.

16 მაისს ცნობილი გახდა, რომ ზუგდიდში, კორონავირუსით ინფიცირებული სატვირთო მანქანის მძღოლის დედასა და ორ შვილს ვირუსი დაუდასტურდა. დაავადებათა კონტროლის ეროვნული ცენტრის სამეგრელო-ზემო სვანეთის ხელმძღვანელის, ანზორ ქობალიას თქმით, კვლევა ინფიცირებულის 7 კონტაქტს ჩაუტარდა, მათგან 3 კი ვირუსი აღმოაჩნდა. კორონავირუსი არ უდასტურდება ინფიცირებულის ცოლს.