ევროპული საქართველოს ლიდერი, გიგი უგულავა ამბობს, რომ 2020 წლის არჩევნებისთვის "მაღალი ალბათობით" მაჟორიტარობის კანდიდატი იქნება. ამის შესახებ მან დღეს, 18 მაისს ლეიბორისტული პარტიის ოფისში, ოპოზიციის შეხვედრის შემდეგ თქვა.

"მაღალი ალბათობით ვიქნები მაჟორიტარი, თუ სხვადასხვა ოპოზიციური პარტიები შევჯერდებით ოლქზე და ჩემს პერსონაზე. მე ამაზე არც მიფიქრია, ლოგიკურია, ვიყო მაჟორიტარი, რადგან სად და როგორ, ვერ ვიტყვი, სხვა პარტიებან უნდა გავიარო კონსულტაცია", — აცხადებს უგულავა.

უგულავა ამბობს, რომ 30 მაჟორიტარი, რაც დაიტოვა ქართულმა ოცნებამ, საზოგადოებისა და საერთაშორისო თანამეგობრობის მხრიდან კომპრომისი იყო:

"ამისათვის მაქსიმალური კოორდინაციაა საჭირო, რათა არ გაიყოს ოპოზიციის ხმები. სხვა შემთხვევაში, ვერაგულად, მამაცურად, მაგრამ დამარცხდები".

18 მაისის შეხვედრაზე ოპოზიციურმამ პარტიებმა განცხადება გაავრცელეს, სადაც ამბობენ, რომ საქართველოს დემოკრატიზაციის გზაზე ერთმანეთთან კოორდინირებულად მოქმედება აქვთ გადაწყვეტილი.

მათი თქმით, პრეზიდენტის მიერ გამოცხადებული გადაწყვეტილება, რომლითაც გიგი უგულავა და ირაკლი ოქრუაშვილი გათავისუფლდნენ, 8 მარტის შეთანხმების შესრულებისკენ და საქართველოში პოლიტიკური სიტუაციის ნორმალიზაციისკენ მნიშვნელოვანი ნაბიჯია.

ოპოზიციის წევრები იმედს გამოთქვამენ, რომ საპატიმროს მალე დატოვებს გიორგი რურუაც და ამის შემდეგ საქართველოს პარლამენტი მიიღებს შეთანხმებულ საკონსტიტუციო ცვლილებებსა და ასევე გადაიდგმება ნაბიჯები საარჩევნო კანონმდებლობის საერთაშორისო რეკომენდაციების საფუძველზე გარდასაქმნელად.