თერჯოლის ცხელების ცენტრის წარმომადგენლის ინფორმაციით, მათთან 13 მაისს შეყვანილ პაციენტს ჩხრეკის დროს ნარკოტიკული საშუალება აღმოაჩნდა. მისი თქმით, 36 წლის კაცი "ფსიქიატრიულში შესვლის წინ" გაჩხრიკეს.

კლინიკის წარმომადგენელი TV პირველთან ამბობს, რომ კაცი საქართველოში 9 მაისს, გერმანიიდან შემოვიდა, შპს იმერმედში კი 13 მაისს, თბილისის ერთ-ერთი სასტუმროს საკარანტინო სივრციდან გადაიყვანეს

"სასტუმროში სამდღიანი ყოფნის პერიოდში განუვითარდა გარკვეული სახის, როგორც ვიცით, ფსიქიკური პრობლემები. გამოძახებულ იქნა ფსიქიატრი. [...] ჩაუტარდა საფუძვლიანი ჩხრეკა ფსიქიატრიულში შესვლის წინ პაციენტს და აღმოჩენილ იქნა როგორც ვიცი, სუბოტექსის 38 აბი და დაფასოებული მარიხუანა", — ამბობს კლინიკის წარმომადგენელი.

On.ge დაუკავშირდა საქართველოს შინაგან საქმეთა სამინისტროს, სადაც ამბობენ, რომ ნარკოტიკების აღმოჩენის შესახებ უწყებას კლინიკამ აცნობა, რის შემდეგაც კაცი დააკავეს. გამოძიება საქართველოს სისხლის სამართლის კოდექსის 260-ე მუხლით მიმდინარეობს, რაც ნარკოტიკების უკანონო შეძენა-შენახვა-გასაღებას გულისხმობს.