სახელმწუიფო უსაფრთხოების სამსახურის ინფორმაციით, ტერორიზმის ბრალდებით ინტერპოლის მიერ ძებნილი ცეზარ ტოხოსაშვილის უკრაინიდან ექსტრადირება მოხდა.

უწყებაში ამბობენ, რომ უკრაინის უსაფრთხოების სამსახურმა, ტერორისტულ ორგანიზაციაში მონაწილეობის ბრალდებით, ცეზარ ტოხოსაშვილი (იგივე ალ-ბარა შიშანი) უკრაინაში, ქალაქ კიევში 2019 წლის 12 ნოემბერს დააკავა.

"ცეზარ ტოხოსაშვილი საქართველოდან სირიის არაბთა რესპუბლიკაში გაემგზავრა და 2015 წლიდან ტერორისტული ორგანიზაცია "ისლამური სახელმწიფოს" რიგებში გაწევრიანდა, სადაც აქტიურად მონაწილეობდა ტერორისტულ საქმიანობაში. მას ახლო ურთიერთობა აკავშირებდა ტერორისტული ორგანიზაცია "ისლამური სახელმწიფოს" ლიდერებთან: თარხან ბათირაშვილთან, ისლამ ატაბიევთან და ახმედ ჩატაევთან", — ამბობენ უწყებაში.

მათივე ინფორმაციით, კონტრტერორისტულ დეპარტამენტში გამოძიება საქართველოს სისხლის სამართლის კოდექსის 327-ე მუხლით მიმდინარეობდა, რაც ტერორისტული ორგანიზაციის წევრობას და მონაწილეობას გულისხმობს.

უწყებაში ამბობენ, რომ ტოხოსაშვილი, მოპოვებული მტკიცებულებების საფუძველზე, დაუსწრებლად იქნა მიცემული პასუხისგებაში და თბილისის საქალაქო სასამართლოს მიერ აღკვეთის ღონისძიების სახით პატიმრობა შეეფარდა.

მათივე ცნობით, საქმე არსებითად განსახილველად გადაგზავნილია თბილისის საქალაქო სასამართლოში.