გამარჯვებული საქართველოს ლიდერის, ირაკლი ოქრუაშვილის თქმით, არც გურამ დონაძესა და არც ზურა მიქაძეს ბუტა რობაქიძის საქმეზე მის წინააღმდეგ ჩვენებები არ მიუციათ. ამ თემაზე ოქრუაშვილმა TV პირველის ეთერში ისაუბრა.

"არც დონაძეს, არც მიქაძეს ჩემი საწინააღმდეგო ჩვენება არ მიუციათ. არცერთ მათგანს, სასამართლოში დაკითხვის შედეგად, 6 საათი გაგრძელდა დაკითხვა, ჩემ საწინააღმდეგოდ ჩვენება არ მიუციათ. დონაძემ პირდაპირ თქვა, რომ არავისი მხრიდან მას არ გაუგია, რომ მე ვინმეს დავავალე იარაღის ჩადება იმ ახალგაზრდების მანქანაში", — თქვა ირაკლი ოქრუაშვილმა.

მისი თქმით, მიქაძემ დაკითხვაზე თქვა, რომ ირაკლი ოქრუაშვილმა მას ჟურნალისტებთან კომენტარის გაკეთება დაავალა, რომ პოლიციასა და ახალგაზრდებს შორის დაპირისპირება მოხდა, იარაღის ჩადებასთან დაკავშირებით, კი ივარაუდა, რომ ამას პოლიტიკოსის განცხადება ამას გულისხმობდა.

ოქრუაშვილმა აღნიშნა, რომ მათ მიმართ არანაირი წყენა არ აქვს, რადგან ყველაფერი ზეწოლის შედეგი იყო.

ამ დრომდე გავრცელებული ინფორმაციის მიხედვით, გურამ დონაძემ ირაკლი ოქრუაშვილის წინააღმდეგ ჩვენება 9 აპრილს მისცა. მან საპატიმრო 13 აპრილს საპროცესო შეთანხმების საფუძველზე დატოვა. მაშინ ადვოკატი, მამუკა ჭაბაშვილი პირველ არხთან აცხადებდა, რომ ოქრუაშვილის ციხეში დატოვების მიზნით პროკურატურამ რობაქიძის საქმის მოწმეებს ჩვენებები საპროცესო შეღავათების მიღების სანაცვლოდ შეაცვლევინა.

გურამ დონაძეს ბუტა რობაქიძის საქმეზე თავისუფლების 5 წლითა და 3 თვით აღკვეთა 2018 წლის დეკემბერში მიესაჯა, ის სასამართლო დარბაზში დააკავეს.

ბუტა რობაქიძის საქმე

ბუტა რობაქიძე 2004 წლის 24 ნოემბერს თბილისში, წერეთლის გამზირზე, დიდუბის ეკლესიის მიმდებარე ტერიტორიაზე მოკლეს. პატრულის თანამშრომლებმა BMW-ს მარკის ავტომობილში მყოფი პირების დაკავების ოპერაცია ჩაატარეს, რომელიც მსხვერპლით დასრულდა — პატრულის მიერ გასროლილი ტყვიით 19 წლის ამირან რობაქიძე გარდაიცვალა. მანქანაში მსხდომი კიდევ ხუთი პიროვნება — კახაბერ აზარიაშვილი, აკაკი ბართაია, გიორგი ქურდაძე, ირაკლი მიქაბერიძე და ლევან დანგაძე — სამართალდამცავებმა დააკავეს.

ბუტა რობაქიძის მკვლელობასთან დაკავშირებით, შინაგან საქმეთა სამინისტროს ყოფილი მაღალჩინოსნების მხრიდან სამსახურეობრივი უფლებამოსილების ბოროტად გამოყენების საქმეზე ბრალდებული იყო 5 პირი: გურამ დონაძე, ზაზა ბაქრაძე, ზურა მიქაძე, ირაკლი ფირცხალავა და დავით იაშვილი.

ზაზა ბაქრაძე ერთადერთია აღნიშნულ საქმეზე ბრალდებულთაგან, რომელიც ჩადენილ დანაშაულს აღიარებს და აცხადებს, რომ ბუტა რობაქიძის მკვლელობის ადგილზე იარაღი მიტანილია და ამაში მასაც აქვს მონაწილეობა მიღებული. ბაქრაძე მიმდინარე წლის 28 თებერვალს ჩვენების მისაცემად დაბრუნდა საქართველოში, რა დროსაც თბილისის საერთაშორისო აეროპორტში დააკავეს. 30 მარტს ის 5 000-ლარიანი გირაოს სანაცვლოდ სხდომათა დარბაზიდან გაათავისუფლეს.