ქართული ოცნების ერთ-ერთი ლიდერის, სოზარ სუბარის აზრით, პარლამენტში სიმშვიდისთვის ოპოზიციის ბოიკოტი უკეთესია. ამ თემაზე მან იმედის ეთერში ისაუბრა.

"ერთი კვირის წინ თავს იკლავდნენ, გვამუშავეთ, გვამუშავეთო და ახლა თუ ბოიკოტს გამოაცხადებენ, იყვნენ ბოიკოტის რეჟიმში, ეს უკეთესია სინამდვილეში სიმშვიდისთვის, თუნდაც პარლამენტში, თუმცა ისევ გავიმეორებ, საკმარისი ხმები ამ ცვლილებებისთვის არის" — თქვა სოზარ სუბარმა.

პრემიერს მრჩეველმა იმედი გამოთქვა, რომ პარლამენტში მყოფი სხვა დეპუტატები, პატრიოტთა ალიანსი თუ დამოუკიდებელი წევრები გადაწყვეტილებას არ შეცვლიან და საკონსტიტუციო ცვლილებებს მხარს დაუჭერენ. მან, ასევე, აღნიშნა, რომ საარჩევნო სისტემის ეს მოდელი არც ადრე მოსწონდა და არც ახლა, თუმცა მას მხარს ქვეყნის ინტერესებიდან გამომდინარე უჭერს.

ევროპული საქართველო და ნაციონალური მოძრაობა აცხადებს, რომ პარლამენტში საკონსტიტუციო ცვლილებებს მხარს არ დაუჭერენ, სანამ ციხეს მესამე პატიმარი, გიორგი რურუაც არ დატოვებს.

პრეზიდენტმა სალომე ზურაბიშვილმა 15 მაისს ოპოზიციის ლიდერები, გიგი უგულავა და ირაკლი ოქრუაშვილი შეიწყალა. პრეზიდენტმა აღნიშნა, რომ ის არ იწყალებს პოლიტპატიმრებს, რადგან ისინი ქვეყანას არ ჰყავს და ეს შეწყალება ჩვეულებრივ ჰუმანურ პრინციპებს არ ეფუძნება. მისი განმარტებით, გადაწყვეტილება მიიღო, რადგან ქვეყანა პოლიტიკური კრიზისის წინაშე იდგა და პრეზიდენტი ვერ დაუშვებდა პოლიტიზაციასა და დაპირისპირებას.

პრეზიდენტის გადაწყვეტილებას ქართული ოცნების ლიდერებმა "გულდასაწყვეტი" და "არაპოპულარული" უწოდეს. დეპუტატმა მამუკა მდინარაძემ აღნიშნა, რომ ეს არასწორი გადაწყვეტილება იყო, ხოლო ირაკლი კობახიძის მტკიცებით, პრინციპულად არ ეთანხმებიან სალომე ზურაბიშვილის, რომ ორი პოლიტიკოსის ციხეში ყოფნა ქვეყანას საფრთხეს შეუქმნიდა.

პრეზიდენტის გადაწყვეტილება წინ გადადგმულ ნაბიჯად შეაფასეს საერთაშორისო პარტნიორებმა და ხელისუფლებას მოუწოდეს, რომ შეთანხმება სრულად შეასრულოს.

გაიგეთ მეტი: