ამერიკის შეერთებული შტატების თავდაცვის საფრთხის შემცირების სააგენტომ (DTRA) საქართველოს შინაგან საქმეთა სამინისტროს, კორონავირუსის გავრცელების პრევენციისთვის, 250 000 დოლარის ღირებულების პერსონალური დაცვის აღჭურვილობა გადასცა.

შსს-ში ამბობენ, რომ DTRA-სგან მიიღეს სახის დამცავი 2150 ფარი, 1500 ლიტრი სადეზინფექციო სითხე, 12260 რესპირატორი (N95), 576 თერმომეტრი და 12260 თეთრი ერთჯერადი დამცავი სამოსი "Tyvek", დამცავი ხელთათმანებით, ქუდითა და ბახილებით.

მათივე ინფორმაციით, აღნიშნული აღჭურვილობა შინაგან საქმეთა სამინისტროს სხვადასხვა სტრუქტურულ დანაყოფზე განაწილდება: სასაზღვრო პოლიცია, საგანგებო სიტუაციების მართვის სამსახური და განსაკუთრებულ დავალებათა დეპარტამენტი.

უწყებაში აღნიშნავენ, რომ სამინისტროსა და აშშ-ს შორის მრავალწლიანი მჭიდრო თანამშრომლობის ფარგლებში არაერთი წარმატებული პროექტი განხორციელდა, რომლებმაც მნიშვნელოვნად შეუწყო ხელი უწყების შესაძლებლობების გაძლიერებას.