სტატიაში სერიალ Killing Eve-ის მესამე სეზონის ახალი ეპიზოდიდან სპოილერებია, ასე რომ, კითხვის გაგრძელება შენი ნებაა.

როგორც Killing Eve-ის მესამე სეზონის ახალი სერიიდან ვიგებთ, ვილანელის უმცროსი ძმა, ბორკა, ელტონ ჯონის სუპერფანია და მისი კონცერტისთვის ბილეთებს ყიდულობს. 10 მაისს გამოსული მეხუთე ეპიზოდის სახელი, Are You From Pinner? ასევე ელტონ ჯონის მშობლიურ ქალაქთან ასოციაციას აჩენს, სერიის განმავლობაში მისი სიმღერები გვატკბობს, ხოლო ვილანელის ერთ-ერთი უნიფორმა ძალიან ჰგავს ელტონის სტილს.

ლეგენდარულმა ინგლისელმა მუსიკოსმა სერიალში მისი მოხსენიება კომპლიმენტად მიიღო, ინსტაგრამზე ჯოდი კომერის ფოტო გამოაქვეყნა და ემოციების დამალვა არც უცდია:

"Killing Eve ისეთი საოცარი სერიალია და აღფრთოვანებული დავრჩი, როდესაც ამ კვირის სერიაში მეც მახსენეს. რაც შეეხება სათვალეს, მე ვფიქრობ, რომ ის შენთვისაა შექმნილი, ჯოდი".

ემის მფლობელმა ჯოდი კომერმა ელტონ ჯონის კომპლიმენტებს ინსტაგრამის პოსტზე და სთორიში უპასუხა:

"არც კი შემიძლია ემოციები დავმალო. ამის შემდეგ, როცა მოწყენილი ვიქნები, ყოველთვის ამას შევხედავ".

სერიალის მესამე სეზონის ფინალური, მე-8 ეპიზოდი BBC One-სა და AMC-ზე 31 მაისს გამოვა.