ჩეხი ევროპარლამენტარი მწვანეთა ალიანსიდან, მარკეტა გრეგოროვა საქართველოში შექმნილი ვითარების შესახებ საუბრობს და ამბობს, რომ პოლიტიკური პატიმრები შეთანხმების ნაწილი იყო და ამაზე თავადაც იყო ინფორმირებული. ამის შესახებ ევროპარლამენტარმა მედია-პროექტში Пограничная ZONA იგორ კუროპტევისთვის მიცემულ ინტერვიუში ისაუბრა.

ევროპარლამენტარმა აღნიშნა, რომ თუკი იმას ამტკიცებენ, რაც სიმართლე არაა, ეს საგანი შესაძლოა დიპლომატიური სკანდალის საფუძველი გახდეს.

"რა თქმა უნდა, ელჩების გადასაწყვეტია, როგორი რეაქცია ექნებათ და როგორ მოიქცევიან მომავალში საქართველოს მთავრობისა და იმ მაღალჩინოსნების მიმართ, რომლებიც ამას ამტკიცებენ [რომ პოლიტპატიმრების საკითხი შეთანხმების ნაწილში არ ყოფილა], მაგრამ თუკი ეს სიმართლე არ არის, ჩვენ 8 მარტს ყველა მხარის მხრიდან მივიღეთ ინფორმაცია, რომ შეთანხმება იყო ისეთი, როგორიც იყო. თუკი ისინი ამტკიცებენ იმას, რაც სიმართლე არ არის, ეს, შესაძლოა, იქცეს დიპლომატიური სკანდალის საგნად.

რა თქმა უნდა, [ეს სკანდალი] ყოველთვის დიპლომატიურ დონეზე დარჩება და მედიაში არ გამოქვეყნდება, მაგრამ პოლიტიკურად ეს იქნება უზარმაზარი პრობლემა, რადგან როდესაც არ შეგიძლია ენდო შენს პარტნიორებს, როგორ უნდა გაერთიანდე და იმუშაო მათთან?!" — თქვა მარკეტა გრეგოროვამ.

დეპუტატმა ინტერვიუში აღნიშნა, რომ წუხს, როცა ამბობენ, რომ პოლიტიკური პატიმრები შეთანხმების ნაწილი არ ყოფილა.

ბოლო დღეებში ოპოზიციასა და მთავრობას შორის მიღწეული საარჩევნო შეთანხმება ისევ განხილვის საგანი გახდა. ოპოზიციაში აცხადებენ, რომ შეთანხმებიდან ორი თვის შემდეგ მმართველი გუნდი პირობებს არ ასრულებს, რადგან პოლიტიკოსები ისევ პატიმრობაში არიან.

ამ თემასთან დაკავშირებით ოპოზიცია ლეიბორისტული პარტიის ოფისში დღეს, 13 მაისს კიდევ ერთხელ შეიკრიბა. პოლიტიკური ლიდერების განცხადებით, მათი პოზიცია ერთიანია და საარჩევნო კანონპროექტს მხარს არ დაუჭერენ, თუ 8 მარტის შეთანხმების ორივე პირობა არ შესრულდება.

ოპოზიციის საპასუხოდ, პარლამენტის თავმჯდომარე აცხადებს, რომ მმართველ გუნდს პატიმრების გათავისუფლების პირობა არავითარი ფორმით, არავის წინაშე არ დაუდია. თალაკვაძის მტკიცებით, ამას მკაფიოდ ადასტურებს ყველა ფაქტი და დოკუმენტი, მათ შორის თავად შეთანხმების ტექსტი. არჩილ თალაკვაძემ ამ საკითხის დადასტურება მოლაპარაკების მონაწილე საერთაშორისო პარტნიორებისგანაც ითხოვა.

დისკუსიას გამოეხმაურნენ საელჩოებიც. მოლაპარაკებებში ჩართული დიპლომატების ერთობლივ განცხადებაში მითითებულია, რომ შეთანხმება შედგება ორი ნაწილისგან: ერთი ფოკუსირებულია საარჩევნო სისტემაზე, მეორე კი ყურადღებას ამახვილებს იმ საკითხების გადაჭრაზე, "რაც სასამართლო სისტემაში პოლიტიკურ ჩარევას ჰგავს". საელჩოებმა მოუწოდეს ყველა მხარეს, სრულად დაიცვან შეთანხმების ორივე ნაწილი, რათა ის წარმატებით განხორციელდეს.

8 მარტს, ხანგრძლივი განხილვების შემდეგ, ოპოზიციამ და მმართველ გუნდმა ახალ საარჩევნო მოდელზე შეთანხმებას ხელი მოაწერა. მხარეებს შორის გაფორმებულ მემორანდუმთან ერთად, მართლმსაჯულების სისტემაზე ოპოზიციისა და ხელისუფლების ერთობლივი განცხადებაც გამოქვეყნდა. სადაც ორივე მხარე, მიუხედავად განსხვავებული აზრისა თანხმდებიან, რომ აუცილებელია რეაგირება ქმედებებზე, რომლებიც შესაძლოა აღქმული იქნეს, როგორც სასამართლო და საარჩევნო პროცესების არასათანადო პოლიტიზაცია.