თურქეთის პრემიერმინისტრმა ბინალი ილდრიმმა გააუქმა კანონი, რომლის მიხედვითაც, კაცებს არასრულწლოვან გოგოებთან სექსუალური კავშირი ეპატიებოდათ, თუ ისინი მათ ცოლად მოიყვანდნენ.

მთავრობამ გადაწყვეტილება მანამდე მიიღო, სანამ საკამათო კანონმდებლობა საბოლოო კენჭისყრას გაივლიდა პარლამენტში.

კანონი, რომელმაც ქვეყანაში საპროტესტო აქციები გამოიწვია, საერთაშორისო ასპარეზზე დაგმეს.

საპროტესტო აქცია თურქეთში: "გაუპატიურების დაკანონება დაუშვებელია". 19 ნოემბერი, 2016 წელი.

ფოტო: EPA

კრიტიკოსები აცხადებდნენ, რომ ის გაუპატიურების ლეგიტიმაციას მოახდენდა და არასრულწლოვანთა ქორწინებას შეუწყობდა ხელს.

ევროკავშირის წარმომადგენლობამ ასევე მოუწოდა თურქეთს, არ მიეღო კანონმდებლობა, რადგან ის ქვეყანას სექსუალური ძალადობის წინააღმდეგ ბრძოლაში ხელს შეუშლიდა.

თურქეთის მთავრობის განცხადებით, კანონმდებლობის მიხედვით, მოძალადე კაცი ციხეში ჩასმას გადაურჩებოდა, თუ მას გოგოს ოჯახი დაქორწინების თანხმობას მისცემდა.

თურქეთში ქორწინებისთვის ლეგალური ასაკი 18 წელს ზემოთაა, თუმცა ქვეყანაში არასრულწლოვანთა ქორწინება გავრცელებულია.