კანადელმა მომღერალმა ბრაიან ადამსმა ინსტაგრამზე პოსტი გამოაქვეყნა, რომელშიც ჩინელ ხალხს აკრიტიკებს და გადაუმოწმებელი ინფორმაციებით ესხმის თავს. ამ კვირაში ადამსის კონცერტი ლონდონში უნდა გამართულიყო, თუმცა ის პანდემიის გამო გადაიდო, როგორც მრავალი სხვა ღონისძიება.

"ამ ღამით ჩემი ტურნე უნდა დაწყებულიყო, მაგრამ ვიღაც ღამურებით მკვებავი წყეულების, "სველ ბაზარში" ცხოველებით მოვაჭრეების და ვირუსების შემქმნელი ხარბი ნაბიჭვრების გამო, ახლა მთელი სამყარო გაჩერებულია. რომ არაფერი ვთქვათ იმ ათასობით ადამიანზე, რომლებიც ვირუსის გამო დაიღუპნენ. დროა ვეგანები გახდნენ".

აღწერას თან ერთვოდა ადამსის მიერ სახლში გიტარის თანხლებით შესრულებული 1983 წლის ჰიტის Cuts Like a Knife-ის ვიდეო.

მისი გაჟღერებული მოსაზრებები ეყრდნობა გავრცელებულ ვარაუდებს კორონავირუსის წყაროს შესახებ. ერთ-ერთი ასეთი ვარაუდია, რომ ინფექცია ღამურის კერძებით გავრცელდა, ან პანგოლინებისგან, რომლებიც ღამურებმა დააინფიცირეს. გარდა ამისა, დაავადების ადრეული შემთხვევები უხანში, იმ ადამიანებში დაფიქსირდა, რომლებსაც შეხება ჰქონდათ ე.წ. "სველ ბაზართან" — ადგილზე ახალი ხორცი და ზღვის პროდუქტი იყიდება.

თუმცა, პირველადი შემთხვევების დიდი ნაწილი არ უკავშირდებოდა ჩინეთის ბაზარს. ერთ-ერთი ვერსიით, ვირუსი უხანის ლაბორატორიებიდან გავრცელდა, რომლებიც ღამურებში კორონავირუსს სწავლობდნენ. თეორიას მხარს უჭერს აშშ-ის პრეზიდენტი დონალდ ტრამპი, თუმცა, მეცნიერები უარყოფენ იმ ვერსიას, რომ კორონავირუსი ხელოვნურად, ადამიანის მიერაა შექმნილი. ასევე დაუდასტურებელია მოსაზრება, რომ ვირუსი თავდაპირველად ადამიანზე ცხოველისგან გადავიდა. პანდემიის ოფიციალური წყარო ჯერჯერობით უცნობია.

ადამსის სიტყვებს ტვიტერზე არაერთგვაროვანი რეაქცია მოჰყვა. მომხმარებლების ნაწილი მის მოსაზრებას იზიარებდა, ნაწილი კი ქსენოფობიისა და გადაუმოწმებელი ფაქტების გავრცელებაში ადანაშაულებდა.