ბოლო დღეების განმავლობაში მსოფლიოს მრავალ ქვეყანაში პანდემიის გამო მიღებული შეზღუდვები ეტაპობრივად იხსნება ან უფრო მსუბუქ ფორმებს იღებს. ამის პარალელურად კი მრავალმა ხელოვანმა თუ მეცნიერმა საჯარო მიმართვა გაავრცელა, რომელიც მსოფლიო ლიდერებსა და რიგით მოქალაქეებს მოუწოდებს, რომ ეკოლოგიური კატასტროფის თავიდან ასაცილებლად ზომები მიიღონ.

ფრანგულ გამოცემა Le Monde-ში 6 მაისს გამოქვეყნდა განცხადება სახელწოდებით "ნუ დავუბრუნდებით ნორმალურ რეჟიმს", რომლის ავტორებიც მსახიობი ჟულიეტ ბინოში და ცნობილი ფიზიკოსი ორელინ ბარო არიან. ამ ღია წერილს ორასზე მეტი ცნობილი ადამიანი აწერს ხელს, მათ შორისაა პედრო ალმოდოვარი, ქეით ბლანშეტი, ხოაკინ ფენიქსი, ადამ დრაივერი, რუნი მარა, მადონა, ალფონსო კუარონი, რობერტ დე ნირო, მონიკა ბელუჩი და სხვა.

ამ მოწოდებით მათ სურთ, რომ მსოფლიო საზოგადოებამ ყოველდღიური ცხოვრების ღირებულებებს გადახედოს და პანდემიის შემდეგ ჩვეულ რეჟიმში დაბრუნებით მომავალი ეკოლოგიური კატასტროფა არ დააჩქაროს.

"კონსუმერიზმით გატაცებამ და პროდუქტიულობის აკვიატებამ დაგვავიწყა თავად ცხოვრების ღირებულება: თუ როგორი ღირებულია მცენარეები, ცხოველები და ადამიანები. დაბინძურებამ, კლიმატის ცვლილებამ და ბუნებრივი გარემოს განადგურებამ სამყარო კრიტიკულ წერტილამდე მიიყვანა", — ვკითხულობთ განცხადებაში.

ხელოვნებისა თუ მეცნიერების სხვადასხვა დარგში ეს აღიარებული ადამიანები იმედოვნებენ, რომ კორონავირუსის პანდემიის შემდეგ უკეთესად შევაფასებთ იმ სამომავლო საფრთხეებს, რომლებიც კაცობრიობას ემუქრება:

"ყველა ზემოთ ჩამოთვლილი მიზეზისა და გაზრდილი სოციალური უთანასწორობის გამო, გვჯერა, რომ წარმოუდგენელია "ცხოვრების ნორმალურ რეჟიმში დაბრუნება".

რადიკალური ტრანსფორმაცია, რომელიც ჩვენ ყველა დონეზე გვჭირდება, გამბედაობასა და სიმამაცეს მოითხოვს. ეს კი არ მოხდება ერთიანი და მტკიცე ვალდებულების გათავისების გარეშე. ჩვენ ახლავე უნდა დავიწყოთ მოქმედება".