დაავადებათა კონტროლის ცენტრის ცხელი ხაზი 116 001
ჯანდაცვის სამინისტროს ცხელი ხაზი 15 05
მთავრობის ცხელი ხაზი 144

ბოჭორიშვილის კლინიკის სამეთვალყურეო საბჭოს თავმჯდომარის, მაკა სოლოღაშვილის აზრით, შესაძლებელია ითქვას, რომ საქართველოში კორონავირუსის პიკი გადავლილია. ამ თემაზე კითხვას მან ჟურნალისტებთან საუბრისას უპასუხა და მოსახლეობას რეკომენდაციების დაცვისკენ კიდევ ერთხელ მოუწოდა.

"ბოლო ერთი კვირაა ჩვენ ვსაუბრობთ ამ თემაზე, მე ყოველთვის ვამბობ, რიცხვები ძალიან ბევრის მთქმელია. შემოსვლა ჩვენი კლინიკის მაგალითზე არის ძალიან შემცირებული, ახალი პაციენტების გამოვლენა საბედნიეროდ. შეიძლება ითქვას, [პიკი გადავლილია] მაგრამ არ უნდა მოვდუნდეთ, სიფრთხილე არ უნდა დავკარგოთ და დავიცვათ ის რეკომენდაციები, რომლებიც გვაქვს", — თქვა მაკა სოლოღაშვილმა.

ექიმის ინფორმაციით, ბოჭორიშვილის სახელობის კლინიკაში კორონავირუსი მხოლოდ 1 ახალ პაციენტს დაუდასტურდა, რომელიც საშუალო ასაკის ქალია, თეთრიწყაროს კლასტერიდან. სოლოღაშვილის თქმით, ამჟამად ბოქსირებულ პალატაში 75 პაციენტი იმყოფება, მათგან კორონავირუსი დადასტურებული აქვს 62 ადამიანს.

ბოლო მონაცემებით, საქართველოში კორონავირუსით ინფიცირების კიდევ 3 შემთხვევა გამოვლინდა და ჯამში ინფიცირებულთა რიცხვი 638 გახდა. მათგან გამოჯანმრთელებულია 317 ადამიანი, ხოლო გარდაცვლილია — 10. კარანტინის რეჟიმში 4 896 ადამიანი იმყოფება, სტაციონარში მეთვალყურეობის ქვეშ კი 444.

წაიკითხეთ NCDC-სა და WHO-ს რეკომენდაციები კორონავირუსის პრევენციაზე: