ცოტა ხნის წინ იაპონიაში, ადგილობრივი დროით დილის 6 საათზე, ფუკუშიმას პრეფექტურის სანაპიროებთან ძლიერი, 7,3 მაგნიტუდის სიმძლავრის მიწისძვრა დაფიქსირდა.

ფუკუშიმას სანაპიროებთან მოსახლეობის დაუყონებლივი ევაკუაცია გამოცხადა. იაპონიის ხელისუფლება რეგიონის მცხოვრებთ მოუწოდებს, მოერიდონ სანაპიროებს, გაჩერდნენ შემაღლებულ ადგილებზე, ან მაღალი შენობების ზედა სართულებზე, ევაკუაციის შესახებ გააფრთხილონ მეზობლები და დაელოდონ შემდეგ რეკომენდაციებს.

არსებული მონაცემებით, მოსალოდნელია ცუნამი, რომლის სიმაღლეც 3 მეტრამდე იქნება. იაპონიის საზოგადოებრივი მაუწყებლის, NHK–ის ინფორმაციით, მიწისძვრის ეპიცენტრი აღმოსავლეთ სანაპიროდან 37 კილომეტრში, წყნარ ოკეანეში დაფიქსირდა.

ჯერჯერობით, არ ვრცელდება ინფორმაცია ნგრევისა და მსხვერპლის შესახებ.

იაპონური მედია ხელისუფლებაზე დაყრდნობით აცხადებს, რომ რადიაციის დონე არ გაზრდილა ფუკუშიმა დაიჩის ატომურ ელექტროსადგურზე, რომელიც მნიშვნელოვნად დაზიანდა 2011 წელს მომხდარი დამანგრეველი მიწისძვრის შედეგად.

იაპონიის საზოგადოებრივი მაუწყებელი ამ წუთებში პირდაპირ ეთერში აჩვენებს ფუკუშიმას პრეფექტურის სანაპიროს, სადაც წყალი სანაპიროდან ოკეანისკენ იხევს, რაც მოსალოდნელ ცუნამიზე მიუთითებს.