ეკონომიკის მინისტრის, ნათია თურნავას განცხადებით, საერთაშორისო ტურისტების მიღებისთვის პირველ ეტაპზე იგეგმება იმ ტრადიციული მიმართულებების აღდგენა, რა მიმართულებებიც აქამდე უკვე იყო. მისივე თქმით, მთავრობა მოლაპარაკებებს აწარმოებს როგორც ევროკავშირის, ისე ახლო აღმოსავლეთის ქვეყნებთან.

"თუმცა ყველაზე რეალისტურია, რომ პირველი ტურისტები შემოვიდნენ რეგიონებიდან. თუმცა ასევე არ დავკარგავთ არც ერთ შანს, შემოვიყვანოთ ისევ ევროპელი ტურისტები. ჩვენ რომ ვერც შევძლოთ იქ პირველ ეტაპზე გასვლა, ჩვენთან შემომავალი ევროპელი ტურისტი გვინდა, რომ მაქსიმალურად მოვიზიდოთ", — აღნიშნა ეკონომიკის მინისტრმა.

ტურიზმის ამოქმედების გეგმის წარდგენისას ნათია თურნავამ განაცხადა, რომ 15 ივნისიდან შიდა ტურიზმი, ხოლო პირველი ივლისიდან საერთაშორისო ტურიზმის აღდგენა იგეგმება. მისივე თქმით, ამავე პერიოდში უნდა გაიხსნას საზღვრები და დაიწყოს ფრენების აღდგენა. თუმცა მინისტრს არ დაუკონკრეტებია, როდის შეძლებენ საქართველოს მოქალაქეები უცხოეთში ტურისტული მიზნით წასვლას.

როგორც ეკონომიკის მინისტრმა თქვა, კომპანია აირზენასთან მიმდინარეობს მოლაპარაკებები, რომ სულ მცირე ორ მიმართულებაზე რეგულარული ფრენა აღდგეს. ასევე, ვიზეარისგან ელოდებიან იმ მიმართულებების ჩამონათვალს, საიდანაც ტურისტების ჩამოყვანა შეეძლებათ.

ამავე თემაზე: