პრემიერმინისტრის, გიორგი გახარიას განცხადებით, 18 მაისს მარნეული სრულად გაიხსნება. მისივე თქმით, ეპიდემიოლოგიური სიტუაციიდან გამომდინარე საჭიროა ტესტების ჩატარება და ამიტომ საჭიროა გარკვეული დრო.

საქართველოში შეზღუდვების შემსუბუქების მომდევნო ეტაპი შემდეგი კვირიდან, ქალაქების გახსნით დაიწყება და ტურიზმის ამოქმედებით გაგრძელდება. დღეს, 7 მაისს მთავრობამ პოსტკრიზისული გეგმა წარმოადგინა, რომლის თანახმად:

  • 11 მაისიდან იხსნება ჩაკეტილი თბილისი. ორშაბათიდან მოქალაქეებს შეუზღუდავად შეეძლებათ დედაქალაქში შესვლა და გასვლა;
  • 11 მაისიდანვე, ქვეყნის მასშტაბით გაიხსნება ყველა სახის წარმოება და ყველა სახის საცალო და საბითუმო მაღაზია, რომელსაც აქვს შესასვლელი ქუჩიდან. შეზღუდვები კვლავ არ ეხება ტანსაცმლისა და ფეხსაცმლის მაღაზიასა და სავაჭრო მოლებს;
  • მალევე, 14 მაისიდან მიმოსვლა სრულად გაიხსნება რუსთავსა და გარდაბანში. ეს ქალაქები დაახლოებით ერთი თვის წინ, თბილისთან, ქუთაისთან და ბათუმთან ერთად ჩაკეტეს;
  • 18 მაისს სრულად გახსნიან მარნეულს, სადაც მკაცრი კარანტინი მოქმედებს. ამ ქალაქის შედარებით გვიან გახსნა პრემიერმინისტრმა გახარიამ იმით ახსნა, რომ ჯერ კიდევ საჭიროა, იქ მაცხოვრებლებს ტესტირება ჩაუტარდეს.