ნაციონალური მოძრაობის წევრი, ზაალ უდამაშვილი აცხადებს, რომ ფეისბუქის მიერ წაშლილ გვერდებს მის პარტიასთან კავშირი არ აქვს. მისივე თქმით, ნებისმიერი გვერდი უნდა დაიბლოკოს, რომელიც ყალბ ინფორმაციას ავრცელებს.

"აქ ალბათ კიდევ მეორე ფაქტორი არის ის, რომ თავად ქართულმა ოცნებამ იმუშავა იმისთვის, რომ გარკვეული გვერდები დაბლოკილიყო ანუ რეპორტები იგზავნებოდა ამის შესახებ. მთავარი არის ის, რომ დღეს ამ დაბლოკილი გვერდების დიდი ნაწილი ეკუთვნის ქართულ ოცნებას", — განაცხადა უდუმაშვილმა რუსთავი 2-თან.

Facebook-მა ნაციონალურ მოძრაობასთან დაკავშირებული ფეისბუქგვერდები წაშალა. ინფორმაცია ამის შესახებ კომპანიამ ახალი ანგარიში გამოაქვეყნა, რომელიც არაავთენტური ანგარიშების მიერ კოორდინირებულ ქმედებას ეხება. კომპანიის განცხადებით, გაუქმდა 80 გვერდი, 23 პირადი ანგარიში, 41 ჯგუფი და 9 ინსტაგრამ–ანგარიში, რომელიც გამოძიებამ პარტიასთან ასოცირებულ ინდივიდებთან დააკავშირა.

"მოცემული ქმედებების უკან მდგომი ინდივიდები კონტენტზე კომენტარის გასაკეთებელად და ჯგუფებისა თუ გვერდების სამართავად იყენებდნენ ავთენტური და არაავთენტური ანგარიშების კომბინაციას. გვერდების ნაწილი კი მოქმედებდა როგორც დამოუკიდებელი მედიასაშუალება.

უმეტესწილად, მათ მიერ განთავსებული კონტენტი ეხებოდა ლოკალურ მიმდინარე მოვლენებსა და პოლიტიკურ თემებს, როგორებიცაა 2018 წლის არჩევნები, ქართული მართლმადიდებლური ეკლესია, მოქმედი ხელისუფლების პანდემიის მართვის ტაქტიკის კრიტიკა და სხვა. მოცემული გვერდების ნაწილს 2018 წლის შემდგომ არ უმოქმედია", — წერია კომპანიის განცხადებაში.

FB-ის განცხადებაში აღნიშნულია, რომ ზემოთხსენებული ანგარიშების ქმედებები გამოძიებამ მოცემულ რეგიონში მიმდინარე საეჭვო ქმედებათა შესწავლის დროს აღმოაჩინა. ასევე, მათი თქმით, გამოძიებას დაეხმარა ლოკალურად შესული რეპორტები.

გარდა ამისა, ფეისბუქმა წაშალა კოკა ყანდიაშვილის მედია Espersona-სთან დაკავშირებული გვერდები და ანგარიშები.

ეს პირველი შემთხვევა არ არის, როდესაც ფეისბუქი არაავთენტურ ან კოორდინირებულ ქმედებაში შენიშნულ ანგარიშებს ბლოკავს. აქამდე ორგანიზაციამ მმართველ გუნდთან, ქართულ ოცნებასთან და სარეკლამო ორგანიზაცია პანდასთან დაკავშირებული ასეულობით ანგარიში და გვერდი წაშალა.