პარლამენტში ევროპული საქართველოს დეპუტატი, გიორგი კანდელაკი ამბობს, რომ ხელნაწერთა ეროვნული ცენტრის დირექტორის, ზაზა აბაშიძის კომენტარი სოციალურ ქსელში ეთნიკური შუღლის გაღვივება და ძალადობისკენ მოწოდებაა. ამასთან, კანდელაკი აბაშიძის თანამდებობიდან მოხსნას და მის მიმართ კანონმდებლობით გათვალისწინებული ზომების გატარებას ითხოვს.

ზაზა აბაშიძის პირად ფეისბუკპროფილით გაკეთდა კომენტარი, რომლის თანახმადაც მარნეულის სოფლის მაცხოვრებლები უნდა "ჩაკეტონ და ამოხოცონ", რასაც თან ერთვოდა რუსულ ენაზე გინება. კიდევ ერთ კომენტარში ზაზა აბაშიძემ მარნეულელებს ვირუსის პოტენციური გამავრცელებლები, მკვლელები უწოდა, აგინა მათ და გაიმეორა, რომ ისინი უნდა გამოკეტონ.

ევროპული საქართველოს დეპუტატი აღნიშნავს, რომ ეთნიკური შუღლის გაღვივება და ძალადობისკენ მოწოდება კანონმდებლობით დასჯადია.

"ბატონი აბაშიძე, რომელიც ქართული ოცნების ერთ-ერთი სახეა, რომელიც პოლიტიკური ნიშნით დაინიშნა თავის დროზე ამ თანამდებობაზე, კვლავაც ინარჩუნებს საკუთარ პოზიციას. [...] ეთნიკური შუღლის გაღვივება არა თუ დაუშვებელია, ეროვნული უსაფრთხოების საკითხია ჩვენი ქვეყნისთვის. მის მიმართ ვერანაირ შემწყნარებლობას თავისი თავის პატივისმცემელი სახელმწიფო ვერ გამოიჩენს", — განაცხადა გიორგი კანდელაკმა.

ზაზა აბაშიძე ხელმძღვანელობს ხელნაწერთა ეროვნულ ცენტრს, რომელიც, სახელმწიფო ბიუჯეტიდან, ანუ მოქალაქეთა გადასახადებით ფინანსდება, ხოლო ამ პოზიციამდე იგი რუსულ-ქართული საზოგადოებრივი ცენტრის თავმჯდომარე იყო.