აშშ-ს ელჩი კელი დეგნანი შეშფოთებას გამოხატავს ლუგარის ლაბორატორიის ირგვლივ გავრცელებული დეზონფორმაციის გამო. მისი თქმით, "ჰაკერები და უპასუხისმგებლო ადამიანები" რუსეთსა და სხვა ადგილებში თავს ესხმიან საქართველოსა და ლუგარის ლაბორატორიას, პანდემიის კონტროლის დროს.

"ლუგარის ლაბორატორიაზე თავდასხმები უბრალოდ სიცრუე და უპასუხისმგელობაა და ძალიან ვწუხვარ, როცა ამას ვხედავ", — თქვა აშშ-ს ელჩმა საოკუპაციო ხაზთან, სადაც იგი მისი ელჩად დანიშვნის შემდეგ პირველად ჩავიდა. კელი დეგნანი სოფელ ოძისში, საოკუპაციო ხაზთან სუს-ის უფროსის მოადგილე ალექსანდრე ხოჯევანიშვილთან ერთად მივიდა.

ელჩმა აღნიშნა, რომ უკანასკნელ პერიოდში დაფიქსირებული ბორდერიზაციის საკითხები მისთვის ძალიან შემაშფოთებელია და ეს არის ერთ-ერთი მიზეზი, რის გამოც საოკუპაციო ხაზთან ჩავიდა:

"პირველად მომეცა შესაძლებლობა მოვსულიყავი საოკუპაციო ხაზთან და ნამდვილად ვაფასებ შანსს, რომ მენახა საქართველოს ეს ძალიან მნიშვნელოვანი რეგიონი. საკუთარი თვალით ვხედავ მანამდე ამ ლამაზ სოფლებში ერთად მცხოვრები ადამიანების დაშორებით გამოწვეულ ტრაგედიას. ეს ნამდვილად გულდასაწყვეტია. ამერიკის შეერთებული შტატები მტკიცედ უჭერს მხარს საქართველოს სუვერენიტეტს და ტერიტორიულ მთლიანობას და როდესაც ვხედავ, რა შენდება საოკუპაციო ხაზის მეორე მხარეს, კიდევ უფრო მეტად ვრწმუნდები, რომ რუსეთმა უნდა შეასრულოს 2008 წლის ცეცხლის შეწყვეტის ხელშეკრულებით ნაკისრი ვალდებულებები და გაიყვანოს თავისი ძალები, იმ ხელშეკრულებით, რომელიც ხელმოწერილია მის მიერ. [...] განსაკუთრებით კოვიდის დროს, როდესაც ჩვენ ერთად უნდა ვიმუშაოთ, რათა გადავარჩინოთ სიცოცხლე, დამატებითი საფრთხე ბორდერიზაციის სახით არაჰუმანურია. როგორც ვიცი, გადასასვლელები დაიკეტა სექტემბერში, სულ მცირე 13 ადამიანი დაიღუპა და მათი გადარჩენა შესაძლებელი იქნებოდა, თბილისის მიერ კონტროლირებად ტერიტორიაზე გადმოსვლის და სამედიცინო დახმარების მიღების საშუალება რომ ჰქონოდათ..".

სუს-ის მიერ გავრცელებულ განცხადებაში წერია, რომ მათმა წარმომადგენლებმა ელჩს ოკუპირებული ცხინვალის რეგიონიდან მომდინარე ყველა გამოწვევისა და საფრთხის შესახებ მიაწოდეს ინფორმაცია.