უკრაინის პრეზიდენტის თანაპარტიელი, საპარლამენტო ფრაქცია ხალხის მსახურის თავმჯდომარე დავით არახამია აცხადებს, რომ საქართველოს ექსპრეზიდენტ მიხეილ სააკაშვილს თანამშრომლობის სხვა ფორმატი შესთავაზეს. ის არ აკონკრეტებს რა თანამდებობაზეა საუბარი მიზეზად კი იმას ასახელებს, რომ ეს პრეზიდენტის, ვოლოდიმირ ზელენსკის ინიციატივაა.

"ხმები მის ასარჩევად [ვიცე-პრემიერის პოსტზე] საკმარისია, მაგრამ მიხეილ სააკაშვილი ბოლო დღეებში მართავდა ხანგრძლივ კონსულტაციებს პრეზიდენტთან და მათ სხვა ფორმატს მიაგნეს, რომლითაც ითანამშრომლებენ — ახალი თანამდებობა", — განუცხადა მან ჟურნალისტებს.

"უკომენტაროდ" — ასე გამოეხმაურა სააკაშვილი ამ ინფორმაციას ფეისბუქგვერდზე.

რამდენიმე დღის წინ უკრაინულ მედიაში გავრცელდა ინფორმაცია, რომ სააკაშვილს ვიცე-პრემიერობის ნაცვლად, რეფორმების ეროვნულ საბჭოში შესვლა შესთავაზეს.

მანამდე ცნობილი გახდა, რომ ზელენსკიმ ოდესის ყოფილ გუბერნატორს რეფორმების საკითხებში ვიცე-პრემიერის პოსტი შესთავაზა. სააკაშვილის სახელმწიფო თანამდებობაზე დანიშვნის საკითხმა, ქართული მხარის გაღიზიანება გამოიწვია. დაიწყო საუბარი იმაზე, რომ შესაძლოა, ელჩი გამოიწვიონ. ქართული ოცნების წარმომადგენლები პრეზიდენტ ზელენსკის გადაწყვეტილებას კატეგორიულად მიუღებელს უწოდებდნენ.

პეტრო პოროშენკოს დროს მიხეილ სააკაშვილი ოდესის გუბერნატორის პოსტს იკავებდა. თუმცა, მას შემდეგ, რაც სააკაშვილმა კორუფციაზე საუბარი დაიწყო, თანამდებობა დატოვა და ოპოზიციაში გადავიდა, პოროშენკოს განკარგულებით მოქალაქეობა ჩამოართვეს და მის წინააღმდეგ სისხლისსამართლებრივი დევნა დაიწყეს. პოროშენკოს ბრძანებით ის რეადმისიით პოლონეთში დააბრუნეს. საპრეზიდენტო არჩევნებში გამარჯვების შემდეგ ვოლოდიმირ ზელენსკიმ სააკაშვილს მოქალაქეობა დაუბრუნა, რის შემდეგ ის უკრაინაში დაბრუნდა.

ამავე თემაზე: