მთავრობის ადმინისტრაციის ხელმძღვანელის, ნათია მეზვრიშვილის განცხადებით, ამ ეტაპზე კომენდანტის საათი ძალაში საგანგებო მდგომარეობის მოქმედების ვადით, 22 მაისამდე რჩება.

მისი თქმით, შეზღუდვების მოხსნის ეტაპობრივ გეგმებში კომენდანტის საათის, საზოგადოებრივ ტრანსპორტსა და თავშესყრასთან დაკავშირებული შეზღუდვების მოხსნაზე მითითება ვერ მოხვდა იმიტომ, რომ ეს ყველაფერი საგანგებო მდგომარეობის მოქმედების ვადით რჩება ძალაში.

"საგანგებო მდგომარეობის ვადამ გადაიწია 22 მაისის ჩათვლით, რაც იმას ნიშნავს, რომ მოქმედებს ყველა ის შეზღუდვა, რაც არ მოგვიხსნია 27 აპრილს. მათ შორის კომენდანტის საათი მოქმედებს. კომენდანტის საათის მოქმედებას, ისევე როგორც სხვა შეზღუდვების მოქმედებას, მაგალითად საზოგადოებრივ ტრანსპორტზე, აქვს ერთდაერთი მიზანი, ეს არის მობილობის შემცირება", — განაცხადა მეზვრიშვილმა რუსთავი 2-ის ეთერში.

თუმცა, როგორც მეზვრიშვილმა განმარტა, თუ ეპიდემიოლოგიური ვითარება შეიცვლება, კომენდანტის საათი და საზოგადოებრივ ტრანსპორტზე შეზღუდვები უფრო ადრე მოიხსნას.