თბილისის მერის კახა კალაძის განცხადებით, სამომავლოდ მერია ველოსიპედების შემოყვანას აპირებს. ამის შესახებ მან ელექსკუტერების წარდგენის დროს განაცხადა.

"მომავალში დედაქალაქის მერია გეგმას ველოსიპედების შემოყვანას, ასევ სამბორბლიანი ველოსიპედების, ვისაც უფრო კომფორტულად უნდა მგზავრობა, უკან ბავშვები ჩაისვას. ამ პროექტს უშულოდ მერია განახორციელებს", — განაცხადა კალაძემ.

საქართველოში დღეიდან, ელექტროსკუტერების გაზიარების საპილოტე სერვისი ამოქმედდა. თბილისის ცნობით, ეკომეგობრული ტრანსპორტით სარგებლობისთვის შექმნილია სპეციალური აპლიკაცია (BIRD) და ვებგვერდი (www.scroll.eco), სადაც სკუტერის გამოყენების წესები და გადაადგილებისთვის აუცილებელი დეტალებია აღწერილი.

ელექტროსკუტერით პირველი მგზავრობისას ათი წუთი უფასოა. მომხმარებელი მის გააქტიურებას სპეციალური პრომო კოდის საშუალებით შეძლებს. მგზავრობის დაწყების ღირებულება 1 ლარია, ხოლო ყოველი მომდევნო წუთი 35 თეთრი ღირს.

საპილოტე პროგრამის ფარგლებში ჯერ მხოლოდ 10 ერთეული სკუტერია, პროგრამით კი 1 000 ერთეულია გათვალისწინებული.