ინფექციური საავადმყოფოს დირექტორის, თენგიზ ცერცვაძის განცხადებით, საერთო კოვზით ზიარება ინფექციის გავრცელების რისკს შეიცავს და ამას განსაკუთრებული სამეცნიერო კვლევა არ სჭირდება. ამის შესახებ ცერცვაძეს ჟურნალისტებს განუცხადა.

"ეს სენსიტიური თემაა. გარკვეულწილად, ყველანი მაინც გამოვდივართ იქედან, რომ ეს სენსიტიური თემაა. ყველანი პატივს ვცემთ ეკლესიას, საქართველოს ეკლესიას, მაგრამ მე ყოველთვის ვაფიქსირებდი და ვაფიქსირებ ჩემს პოზიციას, რომ საერთო კოვზით ზიარება შეიცავს ინფექციის გავრცელების რისკს. ამისთვის რამე განსაკუთრებული სამეცნიერო კვლევა საჭირო არ არის", — აღნიშნა მან.

რამდენიმე დღის წინ ჯანდაცვის მინისტრმა, ეკატერინე ტიკარაძემ განაცხადა, რომ გადამტანი არის თუ არა ვირუსი ზიარების საერთო კოვზით, ამას "სამეცნიერო კვლევა" სჭირდება

15 აპრილს საქართველოს მთავრობამ და საპატრიარქომ გადაწყვიტა, რომ საგანგებო მდგომარეობისა და კომენდანტის საათის მიუხედავად, აღდგომის ლიტურგიას მრევლი დაესწრებოდა.

საგანგებო მდგომარეობის მიუხედავად მრევლი ეკლესიებში მივიდა და ლიტურგიის ბოლოს ეზიარა. მოქალაქეები ტაძრებში საღამოს ცხრა საათამდე მივიდნენ და სახლებში დაბრუნება მხოლოდ დილის 6 საათის შემდეგ შეძლეს.

მაშინ, როცა სასულიერო პირების ნაწილი მოსახლეობას საგანგებო რეჟიმის დარღვებისკენ მოუწოდებდა, ექიმები მოქალაქეებს სთხოვდნენ, რომ აღდგომის ღამეს სახლში დარჩენილიყვნენ, რათა ეპიდემიის გავრცელებისთვის ხელი არ შეეწყოთ.

ამ დროისთვის საქართველოში კორონავირუსის დადასტურებული 420 შემთხვევაა, მათ შორის გამოჯანმრთელებულია 111, ხოლო გარდაცვლილი — 5 ადამიანი. კარანტინის რეჟიმში 5223 პირი იმყოფება, სტაციონარში მეთვალყურეობის ქვეშ კი — 584.

წაიკითხეთ NCDC-სა და WHO-ს რეკომენდაციები კორონავირუსის პრევენციაზე: