გირჩის ლიდერ ზურაბ ჯაფარიძესთან ერთად, პოლიცია იპოდრომზე მყოფ სხვა ადამიანებს აკავებს.

პოლიცია არ განმარტავს, რა არის ამის მიზეზი. მოქალაქეების ნაწილი ძალის გამოყენებით დააკავეს.

ერთ-ერთი მოქალაქის დაკავებისას, საპატრულო პოლიციის თანამშრომლემა On.ge-ს ჟურნალისტს უთხრა, რომ იპოდრომზე მყოფი მოქალაქე ადმინისტრაციულ სამართალდარღვევათა კოდექსის 166-ე და 173-ე მუხლებით დააკავეს. 166-ე მუხლი წვრილმან ხულიგნობას გულისხმობს, ხოლო 173-ე პოლიციის მოთხოვნისადმი დაუმორჩილებლობას.

ზურაბ ჯაფარიძე იპოდრომზე საგანგებო მდგომარეობის გაუქმებას ითხოვდა. მისი თქმით, ადამიანებმა დაკარგეს შემოსავლები, ვეღარ იხდიან სესხებს და მათ არავინ ეუბნება "როდის შეიძლება დამთავრდეს ეს ჯოჯოხეთი".

ჯაფარიძე აქციის დაანონსების დროს ამბობდა, რომ აქციის ორგანიზატორი თავადაა და მხოლოდ ის უნდა დაჯარიმდეს, სხვები კი იპოდრომზე დისტანციის დაცვით სასეირნოდ გამოვიდოდნენ.

საქართველოში 22 მაისამდე საგანგებო მდგომარეობაა, რომლის მიხედვით, შეკრებები და მანიფესტაციები იკრძალება. აკრძალულია ერთ სივრცეში სამ ადამიანზე მეტის შეკრებაც. თუმცა ამ და სხვა წესების დარღვევის საშუალება მიეცა მართლმადიდებელი ეკლესიის საპატრიარქოს — მათ სააღდგომო წირვა-ლოცვა თითქმის უცვლელი წესით ჩაატარეს და სხვა მოქალაქეებისგან განსხვავებით, ჰქონდათ მანქანებით გადაადგილებისა და 9 საათის შემდეგ შეკრების უფლება.