საგანგებო მდგომარეობის გაუქმების მოთხოვნით გირჩი 23 აპრილს აქციას გამართავს. გირჩის ლიდერის, ზურაბ ჯაფარაძის ინფორმაციით აქცია იპოდრომზე, 2 საათზეა დაგეგმილი.

მისი თქმით, რადგან პროტესტი ზოგადად აკრძალულია, ისევე, როგორც შეკრება-მანიფესტაცია, პროტესტს იპოდრომზე გამოხატავს, რაც "სამკურნალო პროტესტი" იქნება.

"მე არ მჯერა, რომ უბრალოდ სახლში ჯდომით და სოციალურ ქსელში წუხილით ხელისუფლება რამეს შეისმენს. ერთადერთი რის წინაშეც უკან იხევენ ხალხის რაოდენობაა, ოღონდ ხალხის რაოდენობა გარეთ და არა ნეტში. რადგან პროტესტი ზოგადად აკრძალულია, ისევე როგორც შეკრება-მანიფესტაცია, პროტესტს გამოვხატავ იპოდრომზე. ერთგვარი სამკურნალო-პროტესტი იქნება — სუფთა ჰაერი და მზის სხივები კლავს ვირუსს და აძლიერებს იმუნურ სისტემას", — აცხადებს ჯაფარიძე.

როგორც ჯაფარიძე ამბობს, ერთადერთი ვინც შეიძლება დააჯარიმონ, თავად იქნება, რადგან აქციის ორგანიზატორია.

"თან გააპროტესტებთ, თან გაისეირნებთ, თან გაჯანსაღდებით. დისტანციას დავიცავთ. თუ პოლიციელი დაინტერესდება თქვენით — უბრალოდ, სეირნობთ იპოდრომზე. შესაბამისად ვერ დაგაჯარიმებენ საგანგებო მდგომარეობის წესების დარღვევისთვის", — წერს ჯაფარიძე.