საქართველოს მთავრობა და პრეზიდენტი ამ დრომდე არ გამოხმაურებიან გუშინ, ვაჟა-ფშაველას გამზირზე მომხდარ მკვლელობას. მათ არ გაუვრცელებიათ არც სამძიმარი, რომელსაც, როგორც წესი, უბედური შემთხვევების დროს ავრცელებენ. ბრალდებული შსს-ს თანამშრომელია.

ქალი საკუთარ საცხოვრებელ ბინაში იმყოფებოდა, როცა, სავარაუდოდ, მოპირდაპირე კორპუსიდან ისროლეს. მას ტყვია თავის არეში მოხვდა და დაიღუპა.

გუშინ საღამოსვე გავრცელდა ინფორმაცია, რომ იარაღიდან შსს-ს თანამშრომელმა ისროლა, რაც დღეს პროკურატურამ დაადასტურა. უწყებამ თქვა ისიც, რომ ბრალდებული ნასვამ მდგომარეობაში იყო. ის დაკავებულია.

არც შინაგან საქმეთა მინისტრი, არც პრემიერმინისტრი და არც პრეზიდენტი მომხდარს ამ დრომდე არ გამოხმაურებიან. უცნობია, გარდა ერთი ბრალდებულისა, დადგა თუ არა ვინმეს პასუხისმგებლობა. ასევე, უცნობია პასუხი კითხვებზე — რატომ იყენებდა იარაღს შსს-ს თანამშრომელი არასამუშაო დროს და ნასვამ მდგომარეობაში, იყვნენ თუ არა მასთან ერთად უწყების სხვა თანამშრომლები და არღვევდნენ თუ არა ისინი საგანგებო მდგომარეობის რეჟიმს.

On.ge დაუკავშირდა მთავრობის საზოგადოებასთან ურთიერთობის სამსახურის უფროსს. სოფო მდინარაძემ კითხვაზე, აპირებენ თუ არა რამე განცხადების გავრცელებას, კითხვითვე გვიპასუხა: "რა განცხადება უნდა გაავრცელოს?" და ტელეფონი გათიშა.

განცხადება არ გაუვრცელებია არც შინაგან საქმეთა მინისტრსა თუ სამინისტროს. სავარაუდოდ პოლიციელის მიერ ქალის მკვლელობას არ გამოხმაურებია არც პრეზიდენტი.

ოფიციალური ინფორმაციით ვიცით მხოლოდ ის, რომ ს.გ.-მ ნასვამ მდგომარეობაში საკუთარი საცხოვრებელი ბინის აივნიდან "განახორციელა ცეცხლსასროლი იარაღიდან უმისამართო გასროლა" და ტყვია თავის არეში მოხვდა მიმდებარე კორპუსში მცხოვრებ თ.ა.-ს, რის შედეგადაც ის გარდაიცვალა.

იმის გამო, რომ ბრალდებული შინაგან საქმეთა სამინისტროს თანამშრომელია, საქმე პროკურატურას გადაეცა. უწყების ინფორმაციით, შემთხვევის ადგილის დათვალიერების შედეგად, შსს-ს თანამშრომლის ბინიდან ამოიღეს გასროლილი ტყვიის მასრები და ცეცხლსასროლი იარაღი.

"ექსპერტების მიერ განხორციელდა ნიმუშების აღება. მოწმის სახით გამოიკითხა არაერთი პირი. საქმეზე აქტიურად გრძელდება გამოძიება და ტარდება ყველა საჭირო საგამოძიებო და საპროცესო მოქმედება", — ამბობენ პროკურატურაში.

შსს-ს თანამშრომელი ბრალდებულია საქართველოს სისხლის სამართლის კოდექსის 116-ე მუხლით, რაც გაუფრთხილებლობით სიცოცხლის მოსპობას გულისხმობს და ისჯება შინაპატიმრობით ვადით ექვსი თვიდან ორ წლამდე ან თავისუფლების აღკვეთით ვადით ორიდან ოთხ წლამდე.