CNN საქართველოში მიმდინარე მოვლენებს ეხმაურება და წერს, რომ ქართული მართლმადიდებელი ეკლესიის გადაწყვეტილება საფრთხის ქვეშ აყენებს კორონავირუსთან ბრძოლაში ქვეყნის წარმატებას.

როგორც გამოცემა წერს, ახლა საქართველოს გამოცდის წინაშეა, რადგან მიუხედავად შეზღუდვებისა, დაუმორჩილებელი მართლმადიდებელი ეკლესია აპირებს, აღდგომას მრევლთან ერთად შეხვდეს.

"გავლენიანი ქართული მართლმადიდებლური ეკლესია დიდ სადღესასწაულო ღონისძიებებს გეგმავს, რაზეც ჯანდაცვის სფეროს წარმომადგენლები აცხადებენ, რომ შესაძლოა, დამღუპველი აღმოჩნდეს... თუკი სააღდგომო დღესასწაულებზე ადამიანების თავშეყრა იქნება, საქართველოს მიერ კორონავირუსის წინააღმდეგ ბრძოლაში მიღწეული წარმატება, შესაძლოა, რისკის ქვეშ დადგეს", — წერს გამოცემა.

გამოცემა ხაზს უსვამს ქართული ეკლესიის "დაჟინებას" სხვა მართლმადიდებელი ეკლესიების ფონზე და მაგალითად მოჰყავს რუსული და ბერძნული ეკლესიები, რომლებმაც მრევლს სახლში დარჩენისკენ მოუწოდეს.

სტატიაში მოყვანილია მართლმადიდებელი სასულიერო პირების საფრთხის შემცველი განცხადებებიც, მათ შორის მეუფე გერასიმესი, რომელიც ამტკიცებს, რომ ვირუსის ეკლესიაში გავრცელება გამორიცხულია და იქ ხალხი განსაკურნებლად დადის.

CNN საერთო კოვზით ზიარების წესსაც ეხმაურება და წერს, რომ ეპიდემიოლოგიური საფრთხის მიუხედავად, ეკლესიამ რიტუალის შეცვლაზე უარი თქვა. მათი თქმით, ზიარებისას გამოყენებულ საერთო კოვზს "ხშირად არც კი რეცხავენ".

გამოცემა ბზობაზეც წერს და ამბობს, რომ დღესასწაული ქვეყანაში არსებული კანონის დარღვევით ჩატარდა.

როგორც გამოცემა წერს, მთავრობის ნებისმიერი მცდელობა, შეწყვიტოს რელიგიური ცერემონიები ცალმხრივად, ეკლესიის ღია მხარდაჭერის გარეშე ეფექტური ვერ იქნება.

მიუხედავად სპეციალისტების განცხადებებისა, რომ ეს სახიფათოა და მიუხედავად საგანგებო მდგომარეობისა, 15 აპრილს საქართველოს მთავრობამ და საპატრიარქომ გადაწყვიტეს, აღდგომის ლიტურგიას მრევლი დაესწრება. დაავადებათა კონტროლის ეროვნული ცენტრის დირექტორის მოადგილემ. პაატა იმნაძემ კი თქვა, რომ ინფიცირებულებმა, რომლებმაც არ იციან დაავადების არსებობის შესახებ, ეკლესიებში მივლენ და ავად გახდიან ყველას. მისი თქმით, თუ არ გვინდა საქართველო კუბოების რაოდენობას ვეღარ აუდიოდეს, ყველა სახლში უნდა დარჩეს. მეორე დღეს გამყრელიძემ მოსახლეობას მოუწოდა, რომ ეკლესიაში არ წავიდნენ და სახლში დარჩნენ. მისი თქმით, ერთხელ ტრადიციაზე უარის თქმის გამო, ღმერთი არ გაბრაზდება და ასე ქვეყანა გადაარჩენენ. მანვე სთხოვა ეკლესიას, რომ შეეცვალათ სააღდგომო ლიტურგიის ფორმატი.

ვირუსის ფართოდ გავრცელების საფრთხის შესახებ ეპიდემიოლოგებისა და ექიმების არაერთი მოწოდების მიუხედავად, მთავრობისა და საპატრიარქოს ერთობლივი გადაწყვეტილებით, აღდგომის ღამეს დიდ ეკლესიებში ორი მეტრის დისტანცია იქნება დაცული, პატარა ტაძრებში კი მრევლი ეზოში განაწილდება.ანდრია ჯაღმაიძის განმარტებით, მრევლი ეკლესიაში კომენდანტის საათის დაწყებამდე მივა და დილის 6 საათზე წამოვა. პრემიერ-მინისტრის პრესსპიკერის, ირაკლი ჩიქოვანის განცხადებით, ეკლესიებთან მობილიზებული იქნება პოლიცია.

ეკლესია ასაკობრივი ჯგუფის, რისკჯგუფის, დაავდების ან რაიმე სიმპტომის მქონე ადამიანებს, ასევე, ბავშვებს აძლევს რეკომენდაციას, რომ ყველა ჯანდაცვის სამინისტროსა და დაავადებათა კონტროლის ეროვნული ცენტრის ყველა რეკომენდაცია გაითვალისწინონ. ჯაღმაიძემ, ასევე, თქვა, რომ აღდგომის დღეებში სასაფლაოზე არ წასვლით, არაფერი დაირღვევა და ეს ეკლესიის წესების ნაწილი არაა.

წაიკითხეთ NCDC-სა და WHO-ს რეკომენდაციები კორონავირუსის პრევენციაზე: