საპატრიარქოს საზოგადოებასთან ურთიერთობის სამსახურის უფროსი ამბობს, რომ მომდევნო ერთი კვირის განმავლობაში ჟურნალისტების კითხვებს არ უპასუხებს. ამის შესახებ ანდრია ჯაღმაიძემ Facebook-ის საკუთარ გვერდზე დაწერა.

"ჟურნალისტების საყურადღებოდ: ერთი კვირით არ ვიქნები სამსახურში, ბრწყინვალე შვიდეულში არ გავაკეთებ კომენტარებს", — წერს ჯაღმაიძე.

გამომდინარე იქედან, რომ ქვეყანაში კორონავირუსის ეპიდემიაა და ეკლესიებში ღვთისმსახურება მრევლის თანდასწრებით ტარდება, მედიას საპატრიარქოსთან აქტიური კომუნიკაცია სჭირდება. თუმცა ანდრია ჯაღმაიძეს არ დაუკონკრეტებია, ვის უნდა დაუკავშირდნენ ამ საკითხებზე ჟურნალისტები მომავალი ერთი კვირის განმავლობაში.

15 აპრილს, საქართველოს მთავრობამ და საპატრიარქომ გადაწყვიტეს, რომ საგანგებო მდგომარეობისა და კომენდანტის საათის მიუხედავად, აღდგომის ლიტურგიას მრევლი დაესწრება.

დაავადებათა კონტროლის ეროვნული ცენტრის დირექტორის მოადგილემ. პაატა იმნაძემ კი თქვა, რომ ინფიცირებულებმა, რომლებმაც არ იციან დაავადების არსებობის შესახებ, ეკლესიებში მივლენ და ავად გახდიან ყველას. მისი თქმით, თუ არ გვინდა საქართველო კუბოების რაოდენობას ვეღარ აუდიოდეს, ყველა სახლში უნდა დარჩეს.

მთავრობისა და საპატრიარქოს ერთობლიბი გადაწყვეტილებით, აღდგომის ღამეს დიდ ეკლესიებში ორი მეტრის დისტანცია იქნება დაცული, პატარა ტაძრებში კი მრევლი ეზოში განაწილდება.ანდრია ჯაღმაიძის განმარტებით, მრევლი ეკლესიაში კომენდანტის საათის დაწყებამდე მივა და დილის 6 საათზე წამოვა. პრემიერ-მინისტრის პრესსპიკერის, ირაკლი ჩიქოვანის განცხადებით, ეკლესიებთან მობილიზებული იქნება პოლიცია.

ეკლესია ასაკობრივი ჯგუფის, რისკჯგუფის, დაავდების ან რაიმე სიმპტომის მქონე ადამიანებს, ასევე, ბავშვებს აძლევს რეკომენდაციას, რომ ყველა ჯანდაცვის სამინისტროსა და დაავადებათა კონტროლის ეროვნული ცენტრის ყველა რეკომენდაცია გაითვალისწინონ. ჯაღმაიძემ, ასევე, თქვა, რომ აღდგომის დღეებში სასაფლაოზე არ წასვლით, არაფერი დაირღვევა და ეს ეკლესიის წესების ნაწილი არაა.

წაიკითხეთ NCDC-სა და WHO-ს რეკომენდაციები კორონავირუსის პრევენციაზე: