საქართველოს ბანკი თანამშრომლების უსაფრთხოების დაცვისა და ზრუნვის მიზნით, Glovo-სთან პარტნიორობით, ახალ კამპანიას იწყებს. ერთი თვის განმავლობაში საქართველოს ბანკის თანამშრომლებს საშუალება ექნებათ, Glovo Prime-ის მიტანის სერვისი უფასოდ გაიაქტიურონ.

საქართველოს ბანკში აცხადებენ, რომ აღნიშნული ნაბიჯი დაეხმარება მათ, მოცემულ სიტუაციაში მაქსიმალურად დაიცვან უსაფრთხოების ნორმები და ხელი შეუშალონ ვირუსის კიდევ უფრო გავრცელებას.

Glovo-ს მიტანის სერვისი თბილისში, რუსთავში, ქუთაისსა და ბათუმში მოქმედებს. სწორედ ამ ქალაქებში მცხოვრებ საქართველოს ბანკის თანამშრომლებს ეძლევათ შესაძლებლობა, ერთი თვის განმავლობაში ისარგებლონ Glovo Prime-ით.

Glovo Prime გულისხმობს ულიმიტო და უფასო მიტანის სერვისს სხვადასხვა საკვები ობიექტიდან, სუპერმარკეტიდან თუ აფთიაქიდან. აღნიშნული სერვისით სარგებლობას კი საქართველოს ბანკის თანამშრომლები უფასოდ შეძლებენ.

"საქართველოს ბანკი ზრუნავს საკუთარი თანამშრომლების უსაფრთხოებაზე. ჩვენ გვსურს, ჩვენს თანამშრომლებს, რომლებიც რჩებიან სახლში ან მუშაობენ იმისთვის, რომ სხვები დარჩნენ სახლში, მაქსიმალურად კომფორტული პირობები შევუქმნათ. სწორედ ამ მიზანს ემსახურება ჩვენი და გლოვოს კოლაბორაცია. გვინდა, მათ ხელი შევუწყოთ, კიდევ უფრო მეტად დაიცვან უსაფრთხოების ნორმები, მათი ჯანმრთელობა და ერთად შევუშალოთ ხელი ვირუსის გავრცელებას", — აცხადებენ საქართველოს ბანკში

საქართველოს ბანკი ითვალისწინებს ჯანდაცვის მსოფლიო ორგანიზაციისა და საქართველოს დაავადებათა კონტროლისა და საზოგადოებრივი ჯანმრთელობის ეროვნული ცენტრის მიერ გაცემულ რეკომენდაციებს და მზადყოფნას გამოთქვამს, ერთიანი ძალებით ჩაერთოს კორონავირუსის მიერ გამოწვეული პრობლემების წინააღმდეგ ბრძოლაში.