ამერიკის საელჩო გამარჯვებული საქართველოს ლიდერის, ირაკლი ოქრუაშვილის სასამართლო განაჩენს ეხმაურება და ყველა ხელმომწერ მხარეს მოუწოდებს, რომ 8 მარტის შეთანხმების პირობები სრულად დაიცვან.

"ირაკლი ოქრუაშვილის დაპატიმრების დრომ და გარემოებამ გამოიწვია შეშფოთება პოლიტიკურ ჩარევასა და შერჩევითი სამართლის გამოყენებასთან დაკავშირებით. ეს საქმე ჩრდილს აყენებს სამართალწარმოების მიუკერძოებლობას — საკითხს, რომლის ირგვლივ არსებული შეშფოთების გაქარწყლებას ემსახურებოდა 8 მარტის ერთობლივი განცხადება", — აღნიშნულია განცხადებაში.

13 აპრილს თბილისის საქალაქო სასამართლომ 20 ივნისის საქმეზე ბრალდებულ ირაკლი ოქრუაშვილის 5 წლით თავისუფლების აღკვეთა მიუსაჯა. სასამართლომ ოქრუაშვილი ძალადობის ორგანიზების ნაწილში გაამართლა, ხოლო მონაწილეობის განხრით გაამტყუნა. 20 ივნისის საქმეზე ამ დრომდე 20-მდე პირია პასუხისგებაში მიცემული, მათ შორისა ნაციონალური მოძრაობის ერთ-ერთი ლიდერი ნიკა მელიაც, რომელიც განაჩენს ელოდება.