ნაციონალური მოძრაობის წევრი, რომან გოცირიძე ამბობს, რომ ქართულმა მართლმადიდებელმა ეკლესიამ, როგორც მოსალოდნელი იყო, კორონავირუსის გამოცდას ვერ გაუძლო. ამის შესახებ მან On.ge-სთან განაცხადა.

მისი თქმით, ხელისუფლება და ჰუმანური ეკლესია ადამიანებს უნდა იცავდნენ.

როგორც გოცირიძე ამბობს, კომენდანტის საათი სპეციალურად "ურჩი მრევლისთვის" დააწესეს, თუმცა ამან ვითარება კიდევ უფრო გააუარესა.

"ჩვენი მინისტრები ფარისევლები არიან და ჯვრებს საჯაროდ კოცნიან. მრევლში უამრავი სხვადასხვა ადამიანია, არიან ფანატიკოსებიც. ეს არის მათი პოზა, ეს არის მათი აღქმა და ამათ ვერ გაამტყუნებ, ყველაზე სანუკვარი რაც გააჩნიათ, მათ სწირავენ. ამ შემთხვევაში ეკლესია უნდა იყოს ჰუმანური და კეთილგონიერი, სახელმწიფო კი კონსტიტუციის და მისივე გამოცემული კანონების დამცველი", — განაცხადა გოცირიძემ.

გოცირიძე, ასევე, ხაზს უსვამს იმ სასულიერო პირებს, რომლებიც "ჯანსაღი" პოზიციით გამოირჩევიან და ამბობს, რომ მათი ნაბიჯები "დღევანდელი საპატრიარქოს პირობებში" დასაფასებელია.

"სასიამოვნოა, რომ ეკლესიაში გაჩნდა ახალგაზრდა გონიერი თაობა, რომლებიც გამოირჩევიან ჯანსაღი პოზიციით. მათი ნაბიჯი არც თუ ურისკოა, თუ გავითვალისწინებთ იმ ვითარებას, რაც არის ეკლესიებში და ეს ადამიანები იმსახურებენ გამორჩევას და პატივისცემას. კორონავირუსი ბევრ რამეს სხვანაირად გადააფასებს და მათ შორის ეკლესიის გაჯანსაღებას ხელს შეუწყობს", — განაცხადა გოცირიძემ.

მთავრობის გადაწყვეტილებით, საყოველთაო კარანტინის პირობებში, სამზე მეტი პირის თავშეყრა იკრძალება, გარდა სასურსათო მაღაზიებისა და აფთიაქებისა. მიუხედავად ამისა, ეკლესიებსა და ტაძრებში მსახურებები გრძელდება და მრევლი სოციალური დისტანციის დაცვით წირვებს ჩვეულ რეჟიმში ესწრება.

პირველ აპრილს პატრიარქმა ილია მეორემ გაავრცელა მიმართვა, რომლის თანახმადაც, ტაძრის კარის დახურვა შეუძლებელია და ღია იქნება მათთვის, ვინც ეკლესიაში მისვლას მოისურვებს, შესაბამისად ჩატარდება სააღდგომო ლიტურგიაც. ტაძრებში წირვა-ლოცვების ჩატარებისთვის კი სასულიერო პირებს სამი რეკომენდაცია სმს-თი გაუგზავნეს.

12 აპრილს ცნობილი გახდა, რომ მართლმადიდებელ ეკლესიებშ სააღდგომო ღვთისმსახურებას კომენდანტის საათის დროს ჩაატარებენ.

ბოლო მონაცემებით, საქართველოში კორონავირუსით ინფიცირების 266 შემთხვევაა დადასტურებული, მათ შორის გარდაცლილია 3 ადამიანი. ჯანდაცვის სფეროს წარმომადგენლები ვირუსის გავრცელების პიკს აპრილის ბოლოს, სწორედ საეკლესიო დღესასწაულების დროს ელოდებიან.

წაიკითხეთ NCDC-სა და WHO-ს რეკომენდაციები კორონავირუსის პრევენციაზე: