ნაციონალური მოძრაობის წევრი, რომან გოცირიძე მიიჩნევს, რომ საგანგებო მდგომარეობის პირობები ყველას ეხება და ეკლესიებში სამზე მეტი ადამიანის თავშეყრაც სამართალდარღვევაა. ამის შესახებ მან On.ge-სთან განაცხადა.

მისი თქმით, ის რაც ქვეყანაში ხდება "აღმაშფოთებელია" და მთავარი "ფიგურანტი" არა საპატრიარქო, არამედ ხელისუფლებაა.

როგორც გოცირიძე ამბობს, მთავრობას, ძალაუფლების შენარჩუნების ინყტერესის გამო, არ სურს საზოგადოების იმ ნაწილის განაწყენება, რომელსაც საარჩევნო პროცესებზე ზემოქმედება აქვს.

"ეს არის ძალაუფლების შენარჩუნებისთვის საკუთარი მოსახლეობის გაწირვის აქცია. წულუკიანს უნდა ჰკითხო, პოლიციელი რომ მისდევდეს ქურდს და ყაჩაღს და იმან ეკლესიას შეაფაროს თავი, დადგეს და სანთლების დანთება დაიწყოს, უნდა მოჰკიდოს თუ არა ხელი ქეჩოში და უნდა გამოათრიოს თუ არა პოლიციელმა?", — ამბობს გოცირიძე.

ის აღნიშნავს, რომ საგანგებო მდგომარეობის დროს ეკლესიებში თავშეყრა უნდა იყოს განხილული სამართალდარღვევად, დამრღვევები კი ადმინისტრაციული ზემოქმედების ობიექტად, და არა რწმენისთვის წამებულ ადამიანებად.

მთავრობის გადაწყვეტილებით, საყოველთაო კარანტინის პირობებში, სამზე მეტი პირის თავშეყრა იკრძალება, გარდა სასურსათო მაღაზიებისა და აფთიაქებისა. მიუხედავად ამისა, ეკლესიებსა და ტაძრებში მსახურება გრძელდება და მრევლი სოციალური დისტანციის დაცვით წირვებს ჩვეულ რეჟიმში ესწრება.

იუსტიციის მინისტრმა, თეა წულუკიანმა განაცხადა, რომ პოლიცია ეკლესიაში ვერ შეიჭრება და მრევლს ეკლესიიდან "ქეჩოთი" ვერ გამოიყვანს. მისი თქმით, ეკლესიაში შეჭრა და მრევლის "ქეჩოთი გამოყვანა" ამ წუთში პოლიციის მიმართულება არაა.

პირველ აპრილს პატრიარქმა ილია მეორემ გაავრცელა მიმართვა, რომლის თანახმადაც, ტაძრის კარის დახურვა შეუძლებელია და ღია იქნება მათთვის, ვინც ეკლესიაში მისვლას მოისურვებს, შესაბამისად ჩატარდება სააღდგომო ლიტურგიაც. ტაძრებში წირვა-ლოცვების ჩატარებისთვის კი სასულიერო პირებს სამი რეკომენდაცია სმს-თი გაუგზავნეს.

12 აპრილს ცნობილი გახდა, რომ მართლმადიდებელ ეკლესიებში სააღდგომო ღვთისმსახურებას კომენდანტის საათის დროს ჩაატარებენ.

სამთავრობო გუნდი ისევ აცხადებს, რომ საკარანტინო შეზღუდვები ეხება ყველას და სააღდგომო ლიტურგიაზე შეკრებაც საკომენდანტო საათის დარღვევა იქნება, თუმცა 3-ზე მეტი ადამიანის შეკრებისთვის ეკლესიაში არავინ დაუჯარიმებიათ.

მინისტრთა კაბინეტის წევრები უარს ამბობენ ეკლესიაში მისვლაზე და მოქალაქეებსაც სახლში დარჩენისკენ მოუწოდებენ.

ბოლო მონაცემებით, საქართველოში კორონავირუსით ინფიცირების 266 შემთხვევაა დადასტურებული, მათ შორის გარდაცლილია 3 ადამიანი. ჯანდაცვის სფეროს წარმომადგენლები ვირუსის გავრცელების პიკს აპრილის ბოლოს, სწორედ საეკლესიო დღესასწაულების დროს ელოდებიან.

წაიკითხეთ NCDC-სა და WHO-ს რეკომენდაციები კორონავირუსის პრევენციაზე: