BBC-ის ინფორმაციით, ახალი ზელანდიის სამხრეთ კუნძულზე ძლიერი მიწისძვრა დაფიქსირდა.

ამერიკის გეოლოგიური სამსახურის წარმომადგენლებმა განაცხადეს, რომ მიწისძვრა 7,4 მაგნიტუდის სიმძლავრის იყო.

მიწისძვრის დროს ქალაქ ველინგტონში სირენები ჩაირთო და ხალხი შენობებიდან ქუჩებში ყვირილით გამოიქცა.

ჯერჯერობით უცნობია რა სახის ზარალი გამოიწვია უკანასკნელმა მოვლენამ. ამ დროისთვის არსებული ინფორმაციით, ცუნამის საშიშროება არ არსებობს.

მიწისძვრის ეპიცენტრი ახალი ზელანდიის ქალაქ კრაისტჩერჩიდან 95 კმ-ში დაფიქსირდა. კრაისტჩერჩში 2011 წელს მომხდარ მიწისძვრას 185 ადამიანი ემსხვერპლა. მოვლენამ გაანადგურა ქალაქის ცენტრიც.

ახალ ზელანდიაში, გიზბორნში, სექტემბერში მომხდარმა 7,1 მაგნიტუდის სიმძლავრის მიწისძვრამ ცუნამის საშიშროება შექმნა. ბუნებრივმა კატასტროფამ გამოიწვია ზარალი, თუმცა ადამიანები არ დაშავებულან.

ახალი ზელანდია ე.წ. ცეცხლის წრის არეალში იმყოფება, რაც ხშირი მიწისძვრისა და ვულკანური ამოფრქვევების საშიშროებას ქმნის.