ოპოზიციური პარტიები და სამოქალაქო მოძრაობები კორონავირუსისგან შექმნილი კრიზისის გამო მთავრობას საერთაშორისო ფინანსურ დახმარების მისაღებად მხარს უჭერენ. ამასთან დაკავშირებით ოპოზიცია საერთო განცხადებას ავრცელებს.

მათი ინფორმაციით, პოლიტიკურ ძალებს შორის სრული კონსენსუსი არსებობს იმაზე, რომ საქართველოს ეკონომიკას მნიშვნელოვანი ზომის პირდაპირი ფინანსური ინექცია სჭირდება, რათა პანდემიის მიმდინარეობისას ქვეყანამ ეკონომიკური წონასწორობა შეინარჩუნოს, ხოლო პანდემიის დასრულების შემდეგ ეკონომიკა გადარჩეს.

"ქვეყნის საერთო და სასიცოცხლო ინტერესია, მიიღოს ის საერთაშორისო დახმარება, რომელიც ქვეყნის ხელისუფლებას, როგორც დღევანდელს, ასევე არჩევნების შემდგომ ქართველი ხალხის პოლიტიკური ნების შესაბამისად ფორმირებულ მთავრობას, მისცემს მძიმე ეკონომიკური და სოციალური კრიზისის დაძლევის შესაძლებლობას", — აცხადებენ ოპოზიციაში.

მათივე განმარტებით, ქვეყანაში დღეს შექმნილ ვითარებას, განიხილავენ, "როგორც დემოკრატიის გაძლიერების, საერთო ეროვნული კრიზისის ფონზე, მრავალპარტიული თანამშრომლობის, ხელისუფლებისა და ოპოზიციის ერთიანი პოზიციის დაფიქსირების შესაძლებლობას".

ოპოზიციაში აღნიშნავენ, რომ მიუხედავად კრიზისისა, ხელისუფლებისგან აღებული ვალდებულებების შესრულებას ელოდებიან: "საკონსტიტუციო და საარჩევნო რეფორმის განხორციელებასა და პოლიტიკური პატიმრების გათავისუფლებას".

განცხადების ხელმომწერი პარტიები და სამოქალაქო მოძრაობებია:

  • გირჩი;
  • ევროპული საქართველო;
  • ერთიანი ნაციონალური მოძრაობა;
  • ახალი საქართველო;
  • რესპუბლიკური პარტია;
  • სამოქალაქო მოძრაობა;
  • თავისუფალი საქართველო;
  • ევროპელი-დემოკრატები;
  • პარტია სამართლიანობისთვის;
  • მოძრაობა ახალი საქართველოსთვის;
  • გამარჯვებული საქართველოსთვის;
  • კანონი და სამართალი;
  • თავისუფალი დემოკრატები;
  • საქართველოს პარლამენტართა საზოგადოება;
  • დემოკრატიული მოძრაობა - ერთიანი საქართველო;
  • ემსახურე საქართველოს;
  • სამოქალაქო ალიანსი თავისუფლებისთვის;
  • საქართველო ლიდერთა შორის;
  • ეროვნულ-დემოკრატიული პარტია;
  • მოძრაობა სახელმწიფო ხალხისთვის;
  • ქრისტიან-კონსერვატიული პარტია;
  • ლელო საქართველოსთვის;
  • ნატო ჩხეიძე, საქართველოს პარლამენტის დეპუტატი.