ჯანდაცვის მინისტრის, ეკატერინე ტიკარაძის თქმით, ის პაციენტები, რომლებსაც კორონავირუსის მსუბუქი სიმპტომები აქვთ მკურნალობას სახლში გაივლიან. ამ თემაზე მინისტრმა მთავრობის სხდომაზე ისაუბრა.

"ის პაციენტები, რომლებსაც აქვთ მსუბუქი მიმდინარეობა, ოჯახის ექიმების მუდმივი მეთვალყურეობის ქვეშ, მკურნალობას გაივლიან სახლში. მათი პირველი კომუნიკაცია მოხდება სატელეფონო ზარით და დღეს უკვე გვაქვს საშუალება, რომ 112-ზე მივიღოთ მოქალაქეების ზარები და დავგეგმოთ შემდგომი ტაქტიკა", — თქვა ეკატერინე ტიკარაძემ.

მინისტრმა აღნიშნა, რომ ჩინელ ექიმებთან კონსტიტუციების შემდეგ მიიღეს სტატისტიკა, რომლის მიხედვითაც ძირითადი შემთხვევები უსიმპტომოდ ან მსუბუქი სიმპტომებით მიმდინარეობს. ჩინეთის სტატისტიკის მიხედვით, ეს დაავადებულთა 80% წარმოადგენს.

მინისტრის თქმით, ექიმის პაციენტებს ტელეფონით გაესაუბრება და შემდეგ გადაწყდება პაციენტი გადავა სტაციონარში თუ ბინაში გააგრძელებს მკურნალობას. გართულების ან რაიმე სხვა საჭიროების შემთხვევაში ექიმთან კონსულტაციის შემდეგ პაციენტს საავადმყოფოში გადაიყვანენ.

2 აპრილს საქართველოში კორონავირუსით ინფიცირებულთა რიცხვი 13-ით გაიზარდა და ჯამში 130-მდე შეადგინა. მათ შორის 26 პირი უკვე გამოჯანმრთელდა. კარანტინის რეჟიმში 5550 ადამიანი რჩება, ხოლო სტაციონარში მეთვალყურეობის ქვეშ — 281.

საქართველოში საგანგებო მდგომარეობის პირობები 30 მარტს გამკაცრდა. პრემიერმინისტრმა თქვა, რომ "ფაქტობრივად კარანტინს" აცხადებენ, რომელიც 31 მარტის 8 საათიდან ამოქმედდა და ასევე "ფაქტობრივ კომენდანტის საათს" ითვალისწინებს.