იტალიაში კორონავირუსით გარდაცვლილთა რიცხვმა 10 ათასს გადააჭარბა. ბევრი სვამს კითხვას, რატომ არის იტალიაში ფატალური შემთხვევების ასეთი დიდი რაოდენობა.

აშშ-ს ჰოპკინსის უნივერსიტეტის ბოლო მონაცემებით, იტალიაში კორონავირუსით 10 023 ადამიანია გარდაცვლილი, აქედან მხოლოდ გასულ 24 საათში გარდაიცვალა 889 ადამიანი. ქვეყანაში ვირუსით ინფიცირების 92 472 შემთხვევაა დადასტურებული.

შედარებისთვის, ჩინეთში, პანდემიის ეპიცენტრში, კორონავირუსის 81 997 შემთხვევა გამოვლინდა, საიდან ფატალური შედეგით 3 299 დასრულდა, რაც იტალიის სიკვდილიანობის მაჩვენებელზე თითქმის 3-ჯერ ნაკლებია.

აშშ-ში, სადაც მსოფლიოში კორონავირუსის ყველაზე მეტი შემთხვევაა დადასტურებული — 10 5470, ვირუსით დაღუპულთა რიცხვი — 1 700-ია, რაც იტალიასთან შედარებით გაცილებით ნაკლებია.

იტალიაში კორონავირუსის პრევენციისთვის სპეციალური ღონისძიებების შემოღებიდან მე-6 კვირას, ქვეყანა სიკვდილიანობის მაჩვენებლით მსოფლიოში კვლავ პირველ ადგილზეა.

CNN-ის რეპორტიორები, ექსპერტების დახმარებით შეეცადნენ აეხსნათ, რა არის იტალიაში ფატალური შემთხვევების ზრდის მიზეზი.

სიკვდილიანობის მაღალ მაჩვენებელს ექსპერტები რამდენი ფაქტორით ხსნიან: ასაკოვანი მოსახლეობით, რომელთაც ვირუსის გადატანა უჭირთ და ტესტირების მეთოდით, რომელიც ინფიცირებულების შესახებ ზუსტ სურათს არ იძლევა.

მილანელი ინფექციონისტი, მასიმო გალი, ამბობს, რომ სინამდვილეში ინფიცირებულთა რიცხვი გაცილებით მეტია, ვიდრე ოფიციალურად დადასტურებული შემთხვევებია. მისი თქმით, ვირუსზე ტესტირება მხოლოდ მძიმე შემთხვევებში ხდება, რაც გარდაცვალების მაჩვენებელს უფრო ამცირებს.

მისივე ინფორმაციით, ტესტირებისთვის მთავარი დაბრკოლება დამცავი აღჭურვილობის ნაკლებობა იყო.

როგორც ექიმი ამბობს, ჩრდილოეთ ლომბარდიაში დღეში საშუალოდ 5000 ადამიანს უღებდნენ სინჯებს, თუმცა ეს საჭიროზე ბევრად მცირე რიცხვია, რადგან ათასობით ადამიანი დიაგნოსტირებას სახლში ელოდება.

მისი თქმით, მიუხედავად იმისა, რომ იტალიაში საკმაოდ ძლიერო ჯანდაცვის სისტემაა, განსაკუთრებით ლომბარდიაში, კორონავირუსთან ეს სისტემაც კი უძლური აღმოჩნდა.

ექიმი სხვა ქვეყნების გაფრთხილებისას ამბობს, რომ შეიძლება პაციენტებისთვის საწოლების რაოდენობის გაზრდით "სასწაული მოახდინონ", მაგრამ წამლის ნაკლებობა მთავარი პრობლემაა და ამას ყველა ქვეყანაში იგრძნობენ.

იტალიაში სიკვდილიანობის კიდევ ერთ მიზეზად ქვეყანაში ხანდაზმული მოსახლეობის რიცხვს ასახელებენ, რის მიხედვითაც იტალია იაპონიის შემდეგ მეორე ქვეყანაა. ქვეყანაში ვირუსით გარდაცვლილთა საშუალო ასაკი 78 წელია.

თუმცა, პანდემიის წინაშე მდგარი მოხუცებისთვის დამაიმედებელი გახდა 102 წლის იტალიელი ქალი, რომელიც გამოჯანმრთელდა.

კიდევ ერთი ფაქტორი, რაზეც ექსპერტები ყურადღებას ამახვილებენ, ვირუსის გავრცელების პრევენციისთვის გატარებული ღონისძიებებია.

ჩინეთის პროვინცია ვუჰანში, სადაც პანდემიის ეპიცენტრი იყო, 11 მილიონი ადამიანი კარანტინში მოექცა, შეიზღუდა ყველა სახის სატრანსპორტო გადაადგილება. შედეგად კი, 2 თვის თავზე რეგიონში შეზღუდვები თანდათან იხსნება, რადგან ახალი შემთხვევები იშვიათად ფიქსირდება.

იტალიის მთავრობაც ვირუსის პრევენციისთვის ღონისძიებებს მუდმივად ამკაცრებს. შეზღუდვის დარღვევისთვის იტალიელებს ჯარიმის სახით 3 ათასი ევროს გადახდა მოუწევთ. მოსახლეობას გარეთ გასვლა მხოლოდ საკვებისა და პირველადი საჭიროების ნივთებზე შეუძლია.

თუმცა, როგორც გამოცემა წერს, ჩინეთისაგან განსხვავებით, იტალიის ზომები არც ისე მკაცრია. თუმცა, მთავრობის მიერ გატარებული ზომები "საუკეთესოა", რისი გატარებაც დემოკრატიულ სახელმწიფოში შეიძლება, განსხვავებით ჩინეთის კომუნისტური სისტემის "დრაკონული" შეზღუდვებისგან.