მოიწყინე? არ იცი რა აკეთო? გიჟდები?

ჩვენ გვესმის შენი! ჩვენ კი არა ყველას ესმის, იმიტომ რომ ყველანი ამ დღეში ვართ. კორონა ვირუსმა სახლში ყოფნა აქცია ყველაზე გავრცელებულ საქმიანობად. ადამიანები დისტანციურად მუშაობენ და სწავლობენ, თუმცა მუშაობის და სწავლის გარდა მნიშვნელოვანი ასევე თავისუფალი დროის სახალისოდ გატარება, გართობა, ერთმანეთთან ინტერაქცია და აქტიური ცხოვრების წესის შენარჩუნებაა.

თანამედროვე პრობლემები თანამედროვე გადაწყვეტას მოითხოვს, სწორედ ამ მიზნით, დემოკრატიის ლაბორატორიის, სექტორი 3-ის, კრაკენისა და imitom.ge-ს პარტნიორობით და ფონდი პროდემოსის მხარდაჭერით შეიქმნა ჯგუფი Game of Homes, რომლის მთავარი მიზანი თვითიზოლაციის რუტინის გასახალისებაა. ჯგუფი რამდენიმე დღის წინ შეიქმნა, უკვე 4000-ზე მეტი წევრი ჰყავს და მათ სახლის პირობებში ადვილად განსახორციელებელ თამაშებს, გამოწვევებსა და შეჯიბრებებს სთავაზობს.

ფეისბუქ ჯგუფში შეუძლია დაემატოს ნებისმიერ ადამიანს, რომელსაც რა თქმა უნდა აქვს ფეისბუქ ექაუნთი. წესები მარტივია, ყოველდღიურად იპოსტება 4 დავალება, მონაწილეებმა კი ამ დავალების შესრულების ამსახველ ფოტო ან ვიდეომასალას პოსტის ქვეშ აკომენტარებენ. ყოველდღიურად გამოვლინდებიან შეჯიბრის გამარჯვებულები, რომლებსაც გადაეცემათ სპეციალური პრიზები.

გარდა ამისა ჯგუფში ყოველთვიურად თამაშდება ერთი მთავარი პრიზიც, რომელსაც ყველაზე აქტიური წევრი იგებს. მარტი-აპრილის თვეში ეს პრიზი Play Station 4-ია.

ნებისმიერი დავალების შესრულება შესაძლებელია სახლის პირობებში, მონაწილეობისთვის საჭიროა მხოლოდ სმარტფონი, იუმორი, ცოტა კრეატივი და რა თქმა უნდა ინტერნეტი.

სახლში ყოფნის გამრავალფეროვნება მნიშვნელოვანია, რათა მაქსიმალურად შევუწყოთ ხელი ადამიანების იზოლაციას, რითაც ვირუსის გავრცელების რისკები მინიმუმამდე დავიყვანთ. გარდა ამისა პროექტი ცდილობს დაეხმაროს მასში ჩართულ მცირე ბიზნესს გაყიდვების სტიმულირებაში, საკუთარი პროდუქციის რეკლამირებასა და ამ კუთხით მომხმარებლის წახალისებაში. შექმნას ერთიანობის, მხარდაჭერისადა საერთო პრობლემასთან ბრძოლის სულისკვეთება, ხელს შეუწყოს პოზიტიურ კომუნიკაციასა და ადამიანების ინტერაქციას.

პროექტს ერთობლივად ახორციელებს სექტორი 3, დემოკრატიის ლაბორატორია და კრაკენი ფონდ პროდემოსის ფინანსური მხარდაჭერით. პროექტის პარტნიორია საქართველოს ფოსტა და Glovo.