20 ივნისის საქმეზე დაკავებულმა ბესიკ თამლიანმა საპატიმროს დატოვების შემდეგ თქვა, რომ ბრძოლას აგრძელებს და სახელმწიფოს წინააღმდეგ სარჩელი მომზადებული აქვს. თამლიანმა სასჯელაღსრულების დაწესებულება ცოტა ხნის წინ დატოვა, მისი თქმით, სასამართლოს ეს გადაწყვეტილება მოულოდნელი იყო. ამ თემაზე თამლიანმა TV პირველის ეთერში ისაუბრა.

"მაშინაც როცა 20 ივნისს დაგვაკავეს, ყველას ერთნაირი ბრალი წაგვიყენეს, ზუსტად იგივე ბრალი წამეყენა დღეს, მაშინაც მოსამართლეს შემოგვთავაზა აღიარება, მე მოსამართლეს ვუთხარი, რომ ის რაც თქვენ ჩაწერეთ, მე ამას ვერ ვაღიარებ. ვიცოდი, რომ ჩემს ქმედებას ჰქონდა გარღვევა, ვიცოდი, რომ რაღაც მქონდა გაკეთებული და ამაზე უნდა მეგო პასუხი. ჩემი პრეტენზია იყო ის, რომ რასაც მე მაბრალებენ შეუთავსებელია იმასთან, რაც მოხდა სინამდვილეში", — თქვა ბესიკ თამლიანმა.

20 ივნისის საქმეზე დაკავებულ ბესიკ თამლიანს დღეს, 23 მარტს სასამართლომ აღკვეთის ღონისძიებად 4 000 ლარიანი გირაო შეუფარდა. გირაოს გადახდისთვის მას 25-დღიანი ვადა დაუწესეს. ადვოკატის თქმით, ბესიკ თამლიანის 9 თვიანი პატიმრობის ვადა 4 აპრილს იწურებოდა.

თამლიანის აღკვეთი ღონისძიება თბილისის საქალაქო სასამართლომ 13 მარტსაც განიხილა, თუმცა მოსამართლემ ის პატიმრობაში დატოვა. ლევან იოსელიანი ამბობს, რომ მაშინაც იგივე მოცემულობა იყო, თუმცა სასამართლომ არ დააკმაყოფილა.

ბესიკ თამლიანი ერთ-ერთია იმ ბრალდებულთაგან, რომელსაც ოპოზიცია პოლიტპატიმრად აღიარებს და ხელისუფლებას მის გათავისუფლებად ულტიმატუმს უყენებს. საპარლამენტო ოპოზიცია აცხადებს, რომ თუკი პოლიტპატიმრები არ გათავისუფლდებიან, საარჩევნო რეფორმაზე არც საკონსტიტუციო განხილვებში მიიღებენ მონაწილეობას და არც საბოლოო კენჭისყრაში.

20-21 ივნისის საქმეზე ჯგუფური ძალადობის ორგანიზების, ხელმძღვანელობისა და მასში მონაწილეობის ბრალდებით, პასუხისგებაში 20-მდე პირი მისცეს, მათ შორის პარლამენტის წევრი, ნიკა მელია, რომელსაც ბრალი ედება ჯგუფური ძალადობის ხელმძღვანელობასა და მასში მონაწილეობაში. ასევე, იგივე ბრალი აქვს წაყენებული პოლიტიკოს ირაკლი ოქრუაშვილს.