მაშინ, როცა რეკომენდირებულია, რომ თითოეული ჩვენგანი სახლში დარჩეს და სხვებთან ურთიერთობას მოერიდოს, დროის გაყვანის მრავალგვარი საშუალების გამოძებნა გვიწევს.

თუ სერიალების ყურების ნებისყოფა ჯერ არ გაქვთ და არც წიგნებისკენ მიგიწევთ გული, მაშინ იმ მოკლემეტრაჟიან ფილმებს გთავაზობთ, რომელთაც აქვე, სულ მარტივად და უფასოდ ნახავთ.

იმასთან ერთად, რომ ეს დაგეხმარებათ დროის მცირე მონაკვეთები საინტერესოდ გაიყვანოთ, ამავდროულად ისეთი ცნობილი რეჟისორების შედარებით უცნობ შემოქმედებასაც გაიცნობთ, როგორებიც არიან მარტინ სკორსეზე, კრისტოფერ ნოლანი თუ ტაიკა ვაიტიტი.

1. Pioneer — რეჟისორი დევიდ ლოური

დევიდ ლოური ერთ-ერთი ყველაზე პერსპექტიული თანამედროვე კინოხელოვანია, რომელმაც უკვე გადაიღო ისეთი ცნობილი ფილმები, როგორებიცაა Ain’t Them Bodies Saints და A Ghost Story. მისი ეს 2011 წელს გადაღებული მოკლემეტრაჟიანი ფილმი მამის შესახებ მოგვითხრობს, რომელიც თავის შვილს ძილის წინ შემზარავ ისტორიას უყვება.

2. Six Shooter — რეჟისორი მარტინ მაკდონაჰი

Three Billboards Outside of Ebbing, Missouri-ის რეჟისორმა, მარტინ მაკდონაჰმა 2004 წელს გადაღებული ამ მოკლემეტრაჟიანი სურათით, რომელშიც ბრენდან გლისონი შესანიშნავად თამაშობს, ოსკარი დაიმსახურა.

3. Two Cars, One Night — რეჟისორი ტაიკა ვაიტიტი

სანამ ეს ცნობილი ახალ ზელანდიელი რეჟისორი მარველის ფილმებს გადაიღებდა, მანამდე 2004 წელს ეს მოკლემეტრაჟიანი ემოციური ფილმი შექმნა, რომელმაც ოსკარის ნომინაციაც დაიმსახურა.

4. Wasp — რეჟისორი ანდრეა არნოლდი

ანდრეა არნოლდი ერთ-ერთი ყველაზე გამორჩეული თანამედროვე რეჟისორი ქალია, რომელმაც 2016 წელს ცნობილი სრულმეტრაჟიანი ფილმი American Honey გადაიღო. Wasp კი მისი ასევე გახმაურებული ნამუშევარია, რომელმაც ოსკარიც მოიპოვა.

5. Doodlebug — რეჟისორი კრისტოფერ ნოლანი

კრისტოფერ ნოლანი მთელს მსოფლიოში ცნობილია თავისი უჩვეულო სიუჟეტური ხაზის მქონე ფილმებით და გამონაკლისი არც მისი 1997 წელს გადაღებული მოკლემეტრაჟიანი სურათი Doodlebug-ია.

6. The Big Shave — რეჟისორი მარტინ სკორსეზე

მარტინ სკორსეზემ ეს ფილმი ნიუ-იორკის უნივერსიტეტის კინოსკოლაში ყოფნისას გადაიღო, როგორც მეტაფორა ამერიკისა, რომელიც ვიეტნამის ომის დროს საკუთარ თავს ანადგურებდა.

7. Small Deaths — რეჟისორი ლინ რემსი

სანამ ლინ რემსი ცნობილ სრულმეტრაჟიან ფილმებს You Were Never Really Here-სა და We Need to Talk About Kevin-ს გადაიღებდა, მანამდე ეს მოკლემეტრაჟიანი სურათი შექმნა 1996 წელს, რომელმაც კანის კინოფესტივალის პრიზი დაიმსახურა.

8. Vincent — რეჟისორი ტიმ ბარტონი

1982 წელს გადაღებული ეს საშინელებათა ჟანრის ფილმი ტიმ ბარტონისა და დისნეის ერთობლივი თანამშრომლობის შედეგია. Vincent მოგვითხრობს ბიჭზე, რომელიც მწერალ ედგარ ალან პოს იდეებით შეპყრობილია.

9. Welcome Home — რეჟისორი სპაიკ ჯოუნზი

სპაიკ ჯოუნზმა ეს შთამბეჭდავი ვიდეო მომღერალ FKA Twigs-ის მონაწილეობით Apple-სთვის გადაიღო.

10. The Alphabet — რეჟისორი დევიდ ლინჩი

და ბოლოს მისტიკის დიდოსტატის, დევიდ ლინჩის კიდევ ერთი ექსპერიმენტალური ნამუშევარი.