პრემიერ-მინისტრ გიორგი გახარიას განცხადებით, ტრადიციების აღსრულებასთან დაკავშირებით მთავრობამ რეკომენდაციები გასცა, თუმცა ამ სფეროში რაიმე აკრძალვების აუცილებლობას ის ჯერ ვერ ხედავს. ამის შესახებ პრემიერმა უწყებათაშორისი საბჭოს სხდომის შემდეგ, ბრიფინგზე განაცხადა.

ბრიფინგზე დასმული კითხვა შეეხებოდა რელიგიურ რიტუალებს, ერთ დახურულ სივრცეში ადამიანების შეკრებასა და ზიარების წესს, რა დროსაც მრევლი ერთი კოვზის გამოყენებით ეზიარება.

"მთავრობამ უკვე გასცა რეკომენდაცია დახურულ სივრცეში ღონისძიებების არ გამართვასთან დაკავშირებით. ჩვენ, რა თქმა უნდა, ბევრი და უამრავი ტრადიცია გაგვაჩნია. ტრადიციების აღსრულებაში გარკვეულ რეკომენდაციებს გავცემთ და გავაგრძელებთ. თუმცა იმ ეტაპზე არ მივსულვართ, რომ ამ სფეროში შეგვიძლია გარკვეული აკრძალვის ინსტრუმენტებით შევიდეთ, საბედნიეროდ. თუმცა გარკვეულ კონსულტაციებს ვმართავთ და გავაგრძელებთ", — განაცხადა გახარიამ.

ამავე თემაზე:

დღეს მთვრობამ ახალი შეზღუდვები და რეკომენდაციებიც გაავრცელა. პრემიერმა კი ხაზი გაუსვა, რომ მათი შესრულება სავალდებულოა.

გაიგეთ მეტი ახალ რეკომენდაციებზე:

პანდემია და რეკომენდაციები

17 მარტის მონაცემებით, საქართველოში კორონავირუსით ინფიცირების 34 შემთხვევაა დაფიქსირებული. ერთ ახალ შემთხვევაზე დღეს ინფექციური საავადმყოფოს დირექტორმა, მარინა ეზუგბაიამ განაცხადა.

34-დან ერთი, პირველი პაციენტი, რომელიც ირანიდან შემოვიდა გამოჯანმრთელდა და გუშინ საავადმყოფოდან გაწერეს. კარანტინში რჩება 1008 ადამიანი, სტაციონარში — 64.

მას შემდეგ, რაც ჯანდაცვის მსოფლიო ორგანიზაციამ COVID-19, იგივე კორონავირუსი, საერთაშორისო პანდემიად გამოაცხადა, საქართველოს მთავრობა და უწყებათაშორისი საკოორდინაციო საბჭო მუშაობის საგანგებო რეჟიმზე გადავიდა და შეზღუდვები და რეკომენდაციები გაავრცელა. ყველა მეზობელ ქვეყანასთან მოქალაქეთა მიმოსვლა შეზღუდულია, ასევე, 2 კვირით საზღვარი დაკეტილია უცხო ქვეყნების მოქალაქისთვის. ყველა სახელმწიფო და კერძო დაწესებულებას დისტანციურ რეჟიმში მუშაობის რეკომენდაცია აქვს მიცემული ისევე, როგორც კაფე-ბარებსა და რესტორნებს. ასევე, 70 წელს ზევით მოქალაქეებს თვითიზოლაციაში დარჩენა ურჩიეს.

მთავრობის გადაწყვეტილებით, შსს აკონტროლებს უცხოეთიდან ჩამოსულ, იზოლაციაში მყოფ ყველა პირს და დარღვევის შემთხვევაში ისინი იძულებით კარანტინში გადაყავს. ასევე, შეიქმნება სპეციალური მექანიზმი, რომელიც საკოორდინაციო საბჭოს გადაწყვეტილებების აღსრულებას შეამოწმებს.

წაიკითხეთ NCDC-სა და WHO-ს რეკომენდაციები კორონავირუსის პრევენციის შესახებ:

ამავე თემაზე: