აშშ-ს სენატის საგარეო ურთიერთობათა კომიტეტის რესპუბლიკელი თავმჯდომარე, სენატორი ჯიმ რიში და ევროპის ქვეკომიტეტის დემოკრატი ლიდერი, სენატორი ჯინ შაჰინი მთავრობასა და ოპოზიციას შორის მიღწეული შეთანხმების გამო "მოხარულები" არიან და ამასთან დაკავშირებით განცხადებას ავრცელებენ. სენატორების განცხადებას ამერიკის ხმა ავრცელებს.

როგორც განცხადებაში ვკითხულობთ, სენატორები ელიან, რომ მხარეებს შორი მიღწეული შეთანხმება სრულად განხორციელდება და ცვლილებები სწრაფად დაინერგება. ასევე, ხაზს უსვამენ იმას, რომ შეთანხმება ყველა მხარემ უნდა დაიცვას.

სენატორი რიშის თქმით, ეს შეთანხმება "კრიტიკული ნაბიჯია საქართველოში დემოკრატიისა და კარგი მმართველობის აღდგენისკენ".

"მინდა შევაქო ყველა მხარე იმისთვის, რომ ისინი რთულ კომპრომისებზე წავიდნენ საქართველოს დემოკრატიის დასაწინაურებლად", — აცხადებს სენატორი რიში.

სენატორი რიში ასევე საუბრობს სასამართლო და საარჩევნო პროცესების "არამიზანშეწონილ პოლიტიზირებაზე" და მოელის, რომ "პოლიტიკურად მოტივირებული დაკავებულები" დაუყოვნებლივ გათავისუფლდებიან.

სენატორი ჯინ შაჰინი კი ამბობს, რომ საქართველოს მიერ სენატორების შეშფოთებების გათვალისწინებას აფასებს და იმედს გამოთქვამს, რომ საქართველო გააგრძელებს ამ მიმართულებით სვლას და საკუთარი დემოკრატიული ინსტიტუტების გაძლიერების ერთგული დარჩება.

8 მარტს ოპოზიცია და მმართველი გუნდი საპარლამენტო არჩევნების 120/30-ზე სისტემით ჩატარებაზე შეთანხმდნენ. რაც იმას გულისხმობს, რომ 2020 წლის არჩევნებში პროპორციული სიით 120 დეპუტატი აირჩევა, მაჟორიტარულით კი — 30.

გაიგეთ მეტი: