9 წლის ადალია როუზი სოციალური ქსელების ნამდვილი ვარსკვლავია. მისი ვიდეოები და პოსტები ფეისბუქზე, თვითერსა და იუთუბზე მილიონობით ნახვასა და მოწონებას იმსახურებს. ამის მიზეზი კი ის არის, რომ ეს ერთი ციცქნა გოგონა ახერხებს დანარჩენ სამყაროს დაუმტკიცოს, რომ ცხოვრებით ტკბობა არასდროს უნდა შეწყვიტოთ.

ადალია სულ რამდენიმე თვის იყო, როდესაც საკმაოდ მძიმე დაავადება - ბავშვთა პროგერია ანუ ნაადრევი სიბერე დაუდგინეს. თუმცა ამას ხელი არ შეუშლია გოგონას აქტიური და საინტერესო ცხოვრებისათვის, ის - ცეკვავს, მღერის, ქმნის საინტერესო ვიდეოებს და მისი პოზიტიურობა ყველასათვის გადამდებია.

ადალიას მშობლები ცდილობენ, მისი სამყარო კიდევ უფრო მრავალფეროვანი და ლამაზი გახადონ.

პროგერია

ფოტო: PRF

პროგერია, იგივე ნაადრევი სიბერის სინდრომი, პირველად 100 წლის წინ აღმოაჩინეს. ამ დაავადების მქონე ადამიანები ჩვეულებრივზე 50-ჯერ უფრო სწრაფად ბერდებიან. მეცნიერების აზრით, რომელიმე გენის მუტაციას შეუძლია ბიოლოგიური საათი ააჩქაროს. არსებობს ორი სახის პროგერია - ბავშვებისა და მოზრდილების. ჩვილ ბავშვებში ის 6-12 თვის ასაკიდან იჩენს თავს, რაც გამოიხატება წონის სწრაფად კლებითა და კანის დანაოჭებით. როგორც წესი, ასეთი ბავშვები 10-15 წლის ასაკში იღუპებიან. მოზრდილთა პროგერია კი სექსუალური მომწიფების ასაკიდან ვლინდება, სიმპტომები აქაც ანალოგიურია და ორივე შემთხვევაში ნაადრევი სიკვდილით სრულდება.