საქართველოს მართლმადიდებელი ეკლესიის საპატრიარქომ ვებგვერდზე ტელევიზიის პირდაპირი ეთერი მოხსნა. მანამდე იქ აზარტული თამაშების რეკლამა გაჩნდა, რადგან მათი თქმით, ეთერი ვებპორტალ MYVIDEO-დან მიეწოდებოდათ. საპატრიარქოს პრესსამსახურის განცხადებაში ნათქვამია, რომ ვებგვერდი სატესტო რეჟიმშია და "შესაბამისი ფინანსური მხარდაჭერის შემთხვევაში" აუცილებლად გაკეთდება უშუალოდ საპატრიარქოს გვერდისთვის განკუთვნილი "სთრიმი".

"მოგეხსენებათ, რომ რამდენიმე დღის წინ სატესტო რეჟიმში გაეშვა საპატრიარქოს განახლებული ვებგვერდი, რომლის ახალი ფუნქციაა ე.წ. ლაივ-სთრიმი (პირდაპირი ეთერი). აღნიშნული ლაივი (საპატრიარქოს ტელევიზიის) დროებით აღებულია ვიდეოპორტალ "მაივიდეოდან", რის გამოც პირდაპირი ჩართვის დროს გამოჩნდა აზარტული თამაშების რეკლამა. აღნიშნულმა ფაქტმა გაურკვევლობა გამოიწვია საზოგადოების ნაწილში", — ნათქვამია განცხადებაში.