ემინემის გამოწვევაში, #GodzillaChallenge, ინტერნეტისა და ვებგვერდ Southpawer-ის ფავორიტი 16 წლის ზუგდიდელი ნინი ჩილაჩავაა.

გამოქვეყნებულ ვიდეოში, რომელსაც 100 ათასზე მეტი ნახვა აქვს, თინეიჯერი Godzilla-ს ფრაგმენტს ასრულებს — ზუსტად იმ ნაწილს, რომელშიც ემინემი 30 წამში რეკორდულ 229 სიტყვას ამბობს.

ისევე როგორც რეპის ლეგენდა, ემინემის ქართველი თაყვანისმცემელიც ამდენივე სიტყვას ამბობს 30 წამში.

Godzilla ემინემის ახალი ალბომის, Music to be Murdered by-ის ერთ-ერთი სინგლია. მისი პრომოუშენი და ინტერნეტგამოწვევა აპლიკაცია Triller-ზე დაიწყო, სადაც შედგა სინგლის დებიუტი. გამოწვევაში გამარჯვებული ლითოგრაფიულ ავტოგრაფს, Beats-ის ყურსასმენებსა და ემინემისგან საჯარო გამოხმაურებას მიიღებს. გამოწვევაში მონაწილეობისთვის ტვიტერზე ან ინსტაგრამზე ვიდეო უნდა გამოაქვეყნო, ჰეშთეგით #GodzillaChallenge.